హైదరాబాద్‌లో డెంగ్యూ వైరస్ మ్యుటేషన్: ఫాగింగ్ రసాయనాలను తట్టుకుంటున్న దోమలు – సీసీఎంబీ అధ్యయనం

హైదరాబాద్‌లోని సీసీఎంబీ, ఐఐసీటీ శాస్త్రవేత్తలు చేసిన అధ్యయనంలో డెంగ్యూ వైరస్ జన్యు మార్పు చెందుతున్నట్లు తేలింది. ఈ మ్యుటేషన్ వల్ల దోమలు ఫాగింగ్ రసాయనాలకు చనిపోకుండా తట్టుకుంటున్నాయి.

కాప్ర, కుత్బుల్లాపూర్, జీడిమెట్ల ప్రాంతాల నుంచి వైరస్ శాంపిల్స్ సేకరించి శాస్త్రవేత్తలు ఈ అధ్యయనం చేశారు. వైరస్ దోమ నాడీ వ్యవస్థను హైజాక్ చేసి, దోమను మరింత దూకుడుగా మారుస్తోంది. ఫాగింగ్ చేసినా దోమలు చనిపోకపోగా, ఇతర సాధారణ దోమలకు కూడా డెంగ్యూ సోకుతోంది. సీసీఎంబీ, ఐఐసీటీ శాస్త్రవేత్తల బృందం ఈ ఆందోళనకరమైన విషయాన్ని స్టడీలో వెల్లడించింది.

ఈ దోమలు ఇళ్లలో ఫ్రిజ్ డ్రిప్ ట్రేలు, కూలర్ ట్యాంకులు, పూలకుండీలు, వాటర్ ట్యాంకులు, ఏసీ కండెన్సర్ పైపుల్లో విస్తారంగా వృద్ధి చెందుతున్నాయి. పాఠశాలలు, కార్యాలయాలు వంటి బహిరంగ ప్రదేశాల్లోనూ ఇవి పెరుగుతున్నాయని అధ్యయనం హెచ్చరించింది.

వైరస్ నాలుగు వేర్వేరు వెర్షన్లుగా మారిపోతూ ఏడాది పొడవునా సక్రియంగా ఉంటోంది. ఒక చిన్న దోమలో లక్షల సంఖ్యలో వైరస్ రెప్లికేట్ అవుతోంది. దీంతో ఫాగింగ్ వంటి సాధారణ చర్యలు సరిపోవని శాస్త్రవేత్తలు అభిప్రాయపడుతున్నారు.

ప్రజలు తమ పరిసరాలను పరిశుభ్రంగా ఉంచుకోవడం, నీరు నిల్వ లేకుండా చూసుకోవడం వంటి ముందస్తు జాగ్రత్తలు తీసుకోవాలని వారు సూచిస్తున్నారు.