దక్షిణాయన పుణ్యకాలం 2026 జూలై 16న ప్రారంభం

2026 దక్షిణాయన పుణ్యకాలం జూలై 16వ తేదీ నుండి ప్రారంభమవుతుందని ధార్మిక పండితులు తెలిపారు. సూర్యుడు కర్కాటక రాశిలోకి ప్రవేశించే రోజు నుండి ఈ ఆరు నెలల పుణ్యకాలం మొదలై, మకర సంక్రాంతి వరకు కొనసాగుతుంది.

దక్షిణాయనంలో సూర్యుడు దక్షిణదిశగా ప్రయాణించడంతో దేవతల రాత్రి సమయం ఇదే అని శాస్త్రాలు చెబుతున్నాయి. ఈ కాలంలో శ్రీమహావిష్ణువు యోగ నిద్రలోకి వెళ్తారనే విశ్వాసం ఉంది. అందువల్ల ఆధ్యాత్మిక సాధన, ఉపాసన, దీక్షలకు విశేష ప్రాధాన్యత ఉంటుంది.

ఈ ఆరునెలల వ్యవధిలో తొలి ఏకాదశి, వ్యాసపౌర్ణమి (గురుపౌర్ణమి), వరలక్ష్మీ వ్రతం, జన్మాష్టమి, రక్షాబంధనం, వినాయక చవితి, మహాలయ పక్షాలు, శరన్నవరాత్రులు, కార్తీక మాసం, ధనుర్మాసం వంటి ఎన్నో ముఖ్యమైన పండుగలు వస్తాయి. ముఖ్యంగా మహాలయ పక్షాల్లో పితృదేవతల ఆరాధన, తర్పణాలు చేస్తారు. నాలుగు నెలల పాటు చాతుర్మాస్య దీక్షను చేపట్టే సంప్రదాయం కూడా ఉందని శృంగేరి పీఠానికి చెందిన డాక్టర్ చెక్కెల రాజేంద్ర కుమార్ గారు వివరించారు.

పూర్వకాలంలో వర్షాకాలం కావడంతో వ్యవసాయ పనుల కారణంగా వివాహాలు, ఉపనయనాలు, గృహప్రవేశాల వంటి శుభకార్యాలు దక్షిణాయనంలో నిర్వహించడం కొంతవరకు నిషేధం కాకపోయినా, సంప్రదాయబద్ధంగా ఉత్తరాయణంలో చేసుకోవడం ఉత్తమంగా భావిస్తారు. ఈ సమయంలో ఆధ్యాత్మిక చింతనతో కాలాన్ని సద్వినియోగం చేసుకోవాలని పండితులు సూచిస్తున్నారు.