ధర్మేంద్ర ప్రధాన్ రాజీనామా చర్చ నేపథ్యంలో: గతంలో నైతిక బాధ్యతతో రాజీనామా చేసిన కేంద్ర మంత్రులు

కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్లు వెల్లువెత్తుతున్న నేపథ్యంలో, ఇంతకుముందు కేంద్ర మంత్రులు నైతిక బాధ్యత వహించి రాజీనామా చేసిన సందర్భాలను ఇప్పుడు విస్తృతంగా గుర్తుచేసుకోవడం జరుగుతోంది.

1956లో రైల్వే మంత్రి లాల్ బహదూర్ శాస్త్రి తమిళనాడు అరియలూర్ రైలు ప్రమాదానికి నైతిక బాధ్యత వహించి రాజీనామా చేశారు. 1958లో ఆర్థిక మంత్రి టి.టి. కృష్ణమాచారి ఎల్ఐసి ముండ్రా కుంభకోణం నేపథ్యంలో పదవికి రాజీనామా చేశారు. 1962లో భారత-చైనా యుద్ధ ఓటమి నేపథ్యంలో రక్షణ మంత్రి వి.కె. కృష్ణ మేనన్ తన పదవిని వదిలారు. 1987లో రక్షణ మంత్రి విపి సింగ్ బోఫోర్స్ ఆయుధాల ఒప్పందం వివాదంతో మంత్రివర్గం నుంచి వైదొలిగారు.

1993లో రైల్వే మంత్రి మాధవరావు సింధియా లలిత్పూర్ సమీప రైలు ప్రమాదానికి నైతిక బాధ్యత తీసుకుంటూ రాజీనామా చేశారు. 1996లో కమ్యూనికేషన్స్ మంత్రి సుఖ్రామ్ అవినీతి ఆరోపణలు, సిబిఐ దాడుల తర్వాత రాజీనామా చేశారు. 1999లో రైల్వే మంత్రి నితీష్ కుమార్ గైసాల్ రైలు ప్రమాదంలో వందలాది మరణాలకు బాధ్యత వహిస్తూ రాజీనామా చేయగా, 2000లో మమతా బెనర్జీ రాజకీయ విభేదాలతో మంత్రివర్గం నుంచి వైదొలిగారు. 2001లో రక్షణ మంత్రి జార్జ్ ఫెర్నాండెజ్ తెహల్కా స్టింగ్ ఆపరేషన్ నేపథ్యంలో రాజీనామా చేశారు.

2008లో 26/11 ముంబై ఉగ్రదాడుల తర్వాత హోం మంత్రి శివరాజ్ పాటిల్ రాజీనామా చేశారు. 2010లో టెలికాం మంత్రి ఏ రాజా 2జి స్పెక్ట్రం కుంభకోణం ఆరోపణలతో పదవిని వదిలారు. 2012లో రైల్వే మంత్రి దినేష్ త్రివేది పార్టీ వ్యతిరేకతతో రాజీనామా చేయగా, 2013లో రైల్వే శాఖ మంత్రి పవన్ కుమార్ బన్సాల్ నియామకాల లంచం కేసులో, న్యాయ శాఖ మంత్రి అశ్విని కుమార్ కోల్ బ్లాక్ కేటాయింపుల వివాదంలో రాజీనామా చేశారు. 2017లో వరుస రైలు ప్రమాదాలకు నైతిక బాధ్యత వహించి రైల్వే మంత్రి సురేష్ ప్రభు ప్రధానికి రాజీనామా సమర్పించారు.

ఈ నేపథ్యంలో, ధర్మేంద్ర ప్రధాన్ రాజీనామా అంశంపై రాజకీయ చర్చ కొనసాగుతోంది. గతంలో మాదిరిగా నైతిక బాధ్యతతో రాజీనామా చేయాలా, లేదా విచారణ పూర్తయ్యే వరకు వేచి చూడాలా అన్న చర్చ ఇప్పుడు తెరపైకి వచ్చింది.