డైమండ్ ధరలు ఐదేళ్లలో 51% తగ్గాయి: పండగ సీజన్లో కొనుగోలుకు అనుకూలమా?

గత ఐదేళ్లలో డైమండ్ ధరలు దాదాపు 51 శాతం తగ్గాయి. ఏటా ధరలు పడుతూనే ఉన్నాయి. ఈ పండగ సీజన్ డైమండ్ కొనుగోలుకు అనుకూల సమయమని విశ్లేషకులు చెప్తున్నారు.

ధరలు తగ్గడానికి ప్రధాన కారణం ఉత్పత్తి పెరగడం. కోవిడ్ తర్వాత డైమండ్ గనుల ఉత్పత్తి పెరిగింది. ఉత్పత్తి ఎక్కువైతే ధరలు సహజంగా తగ్గుతాయి. భారత్ నుంచి ఎగుమతయ్యే డైమండ్లలో ఎక్కువ భాగం చైనా, అమెరికాకు వెళ్తుంది. టారిఫ్ పెరగడం, చైనాలో లగ్జరీ వస్తువులపై ఖర్చు తగ్గడం వల్ల డిమాండ్ పడిపోయింది. ల్యాబ్-గ్రోన్ డైమండ్స్ కూడా మార్కెట్లోకి వచ్చాయి. సాధారణ డైమండ్స్ కంటే ఇవి దాదాపు 50 శాతం తక్కువ ధరకు దొరుకుతున్నాయి.

డైమండ్ నగలను బ్యాంకులు, ఫైనాన్స్ కంపెనీలు, బంగారు దుకాణాలు తాకట్టుకు తీసుకోవు. డైమండ్ సెట్ చేసే బంగారం 16 లేదా 18 క్యారెట్ మాత్రమే. 22 క్యారెట్ బంగారంలో డైమండ్ సెట్ అవ్వదు. అత్యవసర సమయంలో ఈ నగలను అమ్మినా పెద్ద మొత్తం రాదు. డైమండ్ రీసేల్ వాల్యూ దాదాపు సున్నా అని చెప్పొచ్చు. అందుకే పెట్టుబడిగా డైమండ్ కొనేవారు తగ్గారు.

కొనుగోలు చేసే ముందు ఐదు విషయాలు చూడాలి: క్యారెట్, కలర్, కట్, క్లారిటీ, సర్టిఫికెట్. కలర్ G లేదా H ఉండాలి. క్లారిటీ VS1 లేదా VS2 ఉండాలి. సర్టిఫికెట్ GIA లేదా IGI ఉంటేనే తీసుకోవాలి. ల్యాబ్-గ్రోన్ డైమండ్ అయితే దాని గురించి స్పష్టంగా తెలుసుకోవాలి. సాధారణ డైమండ్ అని చెప్పి ల్యాబ్-గ్రోన్ డైమండ్ ఇచ్చే అవకాశం ఉంటుందని నిపుణులు హెచ్చరిస్తున్నారు.

ధరలు తగ్గడంతో మధ్యతరగతి బడ్జెట్లోనూ డైమండ్ నగలు వస్తున్నాయి. సాధారణ డిజైన్ ఉన్న అర క్యారెట్ రింగ్, నోస్ పిన్ లేదా స్టడ్స్ 18 క్యారెట్ బంగారంతో ₹1 లక్ష నుంచి ₹1.5 లక్షల లోపు అవుతాయి. GST కూడా కలిపి ఇదే ధర. కొంచెం మంచి డిజైన్ అయితే ₹2 లక్షల నుంచి ₹2.5 లక్షల లోపు అవుతుంది.

ధనత్రయోదశి, దీపావళి సీజన్లో డైమండ్ కొనుగోళ్లు పెరిగే అవకాశం ఉందని మార్కెట్ వర్గాలు చెప్తున్నాయి. బంగారం, వెండితో పాటు డైమండ్ కూడా ఈసారి డిమాండ్లో ఉంటుందని అంచనా.