ప్రియురాలి వివాహాన్ని అడ్డుకోవడానికి అభ్యంతరకర పోస్టర్లు: ఆరుగురి అరెస్టు

సిద్దిపేట జిల్లా దుబ్బాక మండలం పెద్దగుండవెల్లి గ్రామానికి చెందిన దొడ్ల వెంకటేష్ అనే వ్యక్తి తాను ప్రేమిస్తున్న యువతి వివాహం మరో వ్యక్తితో జరుగుతుండడంతో, ఆ పెళ్లిని అడ్డుకోవడానికి అభ్యంతరకర పోస్టర్లు ముద్రించి రెండు గ్రామాల్లో అతికించిన ఘటన వెలుగు చూసింది. ఈ కేసులో పోలీసులు వెంకటేష్ సహా ఆరుగురిని అరెస్టు చేశారు.

వెంకటేష్ ఏడేళ్లుగా ఎన్సాన్‌పల్లి గ్రామానికి చెందిన ఓ యువతిని ప్రేమిస్తున్నాడు. ఆమె కుటుంబం రాజన్న సిరిసిల్ల జిల్లా తంగళ్లపల్లికి చెందిన వేరే యువకుడితో ఆమె వివాహాన్ని నిశ్చయించింది. దీంతో ఆగ్రహించిన వెంకటేష్, తనకు ఆ యువతితో సన్నిహిత సంబంధం ఉన్నట్టు తప్పుడు ప్రచారం చేస్తూ అభ్యంతరకర పోస్టర్లను ముద్రించాడు. తన ఐదుగురు స్నేహితుల సాయంతో ఎన్సాన్‌పల్లి, తంగళ్లపల్లి గ్రామాల్లో ఆ పోస్టర్లను అతికించాడు.

బాధిత కుటుంబ సభ్యులు సిద్దిపేట త్రీ టౌన్ పోలీస్ స్టేషన్‌లో ఫిర్యాదు చేశారు. పోలీసులు దర్యాప్తు చేపట్టి వెంకటేష్‌తో పాటు అతనికి సహకరించిన మరో ఐదుగురిని అరెస్ట్ చేసి రిమాండ్‌కు తరలించారు. ఎసిపి రవీంద్ర మాట్లాడుతూ, మహిళల పరువు ప్రతిష్టలకు భంగం కలిగించే చర్యలకు పాల్పడితే కఠిన చర్యలు తీసుకుంటామని హెచ్చరించారు.