కొరియన్ గ్లాసీ స్కిన్ కోసం వాడే క్రీమ్‌లు సురక్షితమేనా? డెర్మటాలజిస్ట్ డాక్టర్ దీక్ష సూచనలు

సౌందర్య సాధనాలను ఎంచుకునేటప్పుడు "నేచురల్", "ఆర్గానిక్" అనే లేబుల్స్ చూసి ట్రెండ్స్ వెంట పడకూడదని ప్రముఖ డెర్మటాలజిస్ట్ డాక్టర్ దీక్ష సూచించారు. చాలా ఉత్పత్తుల వెనుక భాగంలో ఇంగ్రిడియంట్ల వివరాలు స్పష్టంగా ఉండవని, తయారీదారును, తయారీ స్థలాన్ని గమనించాలని ఆమె పేర్కొన్నారు.

"నో మేకప్" లుక్ కోసం వాడే లిక్విడ్ ప్రొడక్ట్స్ చర్మంలోకి ఎక్కువగా అబ్జర్బ్ అవుతాయని, దీంతో రాషెస్ వంటి సమస్యలు రావచ్చని డాక్టర్ దీక్ష హెచ్చరించారు. కొరియన్ గ్లాసీ స్కిన్ కోసం ప్రత్యేక క్రీములు ఉన్నాయని, కానీ సౌత్ ఇండియన్ చర్మం నార్త్ ఇండియన్ చర్మం నుంచి భిన్నంగా ఉంటుందని, తమ చర్మానికి సరిపోయే ఉత్పత్తులను మాత్రమే వాడాలని సూచించారు.

సినీ నటులు, ఇన్ఫ్లుయెన్సర్లు ప్రచారం చేసే ప్రొడక్ట్స్ వాడితే చర్మం వారిలా మారుతుందని భావించడం సరికాదని ఆమె అన్నారు. వారు కేవలం క్రీముల మీదే ఆధారపడరు; క్రమం తప్పకుండా వ్యాయామం, ఆహార నియమాలు పాటిస్తారని వివరించారు.

భారతీయ వాతావరణంలో సన్ స్క్రీన్ (పగటిపూట), మాయిశ్చరైజర్ (రాత్రిపూట) రెండు తప్పనిసరని సూచించారు. అయితే వేసవిలో రేకుల షెడ్లో నివసించేవారికి మాయిశ్చరైజర్ వాడడం వల్ల చర్మ రంధ్రాలు మూసుకుపోయి ఇన్ఫెక్షన్లు వచ్చే అవకాశం ఉందని హెచ్చరించారు. హైల్యురోనిక్ యాసిడ్, సెరమైడ్స్ వంటి ఇంగ్రిడియంట్లు చర్మానికి మేలు చేస్తాయని తెలిపారు.

చివరగా, ట్రెండ్స్తో ప్రభావితం కాకుండా, చర్మ సురక్షితమే ధ్యేయంగా ఉత్పత్తులను ఎంచుకోవాలని డాక్టర్ దీక్ష విజ్ఞప్తి చేశారు. ఆరోగ్యకరమైన చర్మమే అందమని గుర్తుంచుకోవాలని సూచించారు.