ఎల్ నినో ప్రభావంతో ఖరీఫ్ పంటల్లో చీడపీడల నివారణకు శాస్త్రవేత్త సూచనలు

పొలాస ప్రాంతీయ వ్యవసాయ పరిశోధనా స్థానం శాస్త్రవేత్త స్వాతి ఖరీఫ్ పంటల్లో చీడపీడల నివారణపై రైతులకు సూచనలు చేశారు. ఎల్ నినో ప్రభావంతో వర్షాభావం ఏర్పడి పంటలపై తెగుళ్ల తీవ్రత పెరిగిందని తెలిపారు.

ప్రస్తుతం వరి పంట నారుమడి దశలో ఉండగా, కొన్ని చోట్ల తామర పురుగు, కాండం తొలుచు పురుగు కనిపిస్తున్నాయి. నారుమడిలో పిప్రోనీల్ (2 మి.లీ./లీటర్) పిచికారి చేయాలని, లేదా కార్బోఫిరాన్ 3% గుళికలు 400 గ్రాములు గుంట నారుమడికి బురద దశలో వేసుకోవాలని సూచించారు. నారు ముదిరితే కొనలు తుంచి నాట్లు వేయాలి, ఎందుకంటే ఆకు తొలుచు పురుగు కొనలపై గుడ్లు పెడుతుంది.

మొక్కజొన్నలో కత్తెర పురుగు, కాండం తొలుచు పురుగు ఉధృతి ఉంటే క్లోరంట్రనిలిప్రోర్ 0.3 మి.లీ. లేదా ఎమామెక్టిన్ బెంజోయేట్ 0.4 గ్రాములు లీటర్ నీటికి కలిపి పిచికారి చేయాలన్నారు. సోయా, చిక్కుడు పంటల్లో రసం పీల్చు పురుగులు, తెల్లదోమ, తామర పురుగు రాకుండా బీటా సైఫ్లూత్రిన్ + ఇమిడాక్లోప్రిడ్ లేదా థయామిథాక్సమ్ + లాండా సైహలోత్రిన్ మందులు వాడాలి. పసుపు, నీలి జిగురు అట్టలు ఎకరానికి 20-25 చొప్పున పెట్టి పురుగులను నివారించవచ్చు.

పత్తిలో రసం పీల్చు పురుగులకు పిప్రోనీల్ 2 మి.లీ. లేదా ఇమిడాక్లోప్రిడ్ 0.3 మి.లీ. పిచికారితో నివారించాలని స్వాతి తెలిపారు. సమగ్ర యాజమాన్యంలో భాగంగా లింగాకర్షణ బుట్టలను ఉపయోగించి రసాయన మందుల వాడకాన్ని తగ్గించుకోవచ్చని, దీనివల్ల సాగు ఖర్చు తగ్గుతుందని వివరించారు.

వర్షాభావం కారణంగా ఇంకా నాట్లు వేయని రైతులు వరికి బదులు తక్కువ కాలపరిమితి ఉండే కూరగాయలు లేదా పప్పుధాన్యాల పంటల వైపు మొగ్గు చూపాలని సూచించారు.