ఏలూరు జిల్లాలో పది రోజుల్లో PMDS కిట్ల పంపిణీ పూర్తి: మంత్రి నాదెండ్ల మనోహర్

మంత్రి నాదెండ్ల మనోహర్ ఏలూరు జిల్లాలో PMDS కిట్ల పంపిణీని పది రోజుల్లో పూర్తి చేయాలని అధికారులను ఆదేశించారు. ఏలూరు కలెక్టరేట్‌లోని గోదావరి సమావేశ మందిరంలో జిల్లా సమీక్ష సమావేశం నిర్వహించారు.

ఈ సమావేశంలో జిల్లాలో లక్ష ఎకరాల లక్ష్యానికి గాను 94,300 ఎకరాలకు PMDS కిట్లు అందించినట్టు మంత్రి తెలిపారు. మిగిలిన కిట్లను పది రోజుల్లో రైతులకు అందిస్తామన్నారు. సూపర్ ఎల్నినో పరిస్థితులను ఎదుర్కునేందుకు ఈ పంపిణీ వేగవంతం చేయాలన్నారు.

ప్రకృతి సాగు ద్వారా పండించిన ధాన్యం, కూరగాయలను 'రైతు సంపద' పేరుతో ఆన్‌లైన్‌లో విక్రయించాలని సూచించారు. ప్రభుత్వ కార్యాలయాలు, బస్ స్టాండ్లలో ప్రత్యేక కౌంటర్లు ఏర్పాటు చేయాలన్నారు.

ఆయిల్ పామ్ రైతులకు అవసరమైన మొక్కలు అందుబాటులో ఉంచాలని అధికారులకు సూచించారు. సన్న బియ్యం అందుబాటు ధరలో లభించేలా జిల్లాలో 31 కేంద్రాల ద్వారా రాయితీపై విక్రయాలు చేపట్టినట్టు తెలిపారు. ఈ అవకాశంపై ప్రజలకు అవగాహన కల్పించాలని అధికారులను కోరారు.