జవహర్‌నగర్ డంపింగ్ యార్డ్ తరలింపు కోసం ఈటెల రాజేందర్ పాదయాత్ర ప్రారంభం

జవహర్‌నగర్ డంపింగ్ యార్డ్‌ను తరలించాలని డిమాండ్ చేస్తూ మల్కాజిగిరి ఎంపీ ఈటెల రాజేందర్ నాలుగు రోజుల పాదయాత్ర ప్రారంభించారు. మేడ్చల్-మల్కాజిగిరి జిల్లాలోని ఏదులాబాద్ గ్రామం నుంచి ఈ పాదయాత్ర మొదలైంది.

ఏదులాబాద్‌లోని లక్ష్మీనారాయణ చెరువు వద్ద నుంచి యాత్ర ప్రారంభమైంది. ఈ చెరువులో చేపలు, చిన్న జల జీవులు చనిపోతున్నాయని స్థానికులు చెప్తున్నారు. డంపింగ్ యార్డ్ నుంచి వచ్చే leachate (చెత్త నీరు) నేలలోకి ఇంకి భూగర్భ జలాలు కలుషితమవుతున్నాయని వారు ఆందోళన వ్యక్తం చేస్తున్నారు.

డంపింగ్ యార్డ్ ప్రభావం దాదాపు 30 నుంచి 40 గ్రామాలపై పడుతోందని ఎంపీ ఈటెల రాజేందర్ చెప్పారు. సుమారు 30 కిలోమీటర్ల మేర భూగర్భ జలాలు కలుషితమవుతున్నాయని ఆయన ఆరోపించారు. యార్డ్ నుంచి మీథేన్ వాయువు వెలువడి గాలి కూడా కలుషితమవుతోందని, దీని వల్ల అనారోగ్య సమస్యలు, క్యాన్సర్ కేసులు పెరుగుతున్నాయని స్థానికులు చెప్తున్నారు.

ఈ అంశంపై NGT, సుప్రీం కోర్టు ఇప్పటికే స్పందించినా ప్రభుత్వం స్పందించడం లేదని ఎంపీ ఆరోపించారు. పాదయాత్ర జవహర్‌నగర్ చేరుకున్న తర్వాత శుక్రవారం భారీ బహిరంగ సభ నిర్వహించే ఏర్పాటు ఉంది. ఈ అంశంపై ప్రభుత్వం స్పందన తెలియాల్సి ఉంది.