ఫౌజీ టీజర్‌పై వివాదం: బోస్ కుటుంబ సభ్యుడి లేఖ కేంద్ర మంత్రికి

నటుడు ప్రభాస్ కథానాయకుడిగా నటిస్తున్న 'ఫౌజీ' చిత్రం టీజర్ వివాదానికి దారితీసింది. ప్రభాస్ పుట్టినరోజు సందర్భంగా ఈ టీజర్ విడుదలైంది. ఈ వివాదం ఇప్పుడు కేంద్ర ప్రభుత్వం దృష్టికి చేరింది.

టీజర్‌లో స్వాతంత్ర్య సమరయోధుడు సుభాష్ చంద్ర బోస్‌ను చూపించిన తీరుపై విమర్శలు వస్తున్నాయి. చారిత్రక వ్యక్తులను కల్పిత కథతో ముడిపెట్టి చూపించారని విమర్శకుల అభిప్రాయం. దీనివల్ల బోస్ గౌరవం తగ్గిందని ఆయన కుటుంబ సభ్యుడు చంద్రకుమార్ బోస్ తీవ్ర అభ్యంతరం వ్యక్తం చేశారు.

దర్శకుడు హను రాఘవపూడి, చిత్ర నిర్మాణ సంస్థల తీరుపై ఆయన అసంతృప్తి తెలిపారు. టీజర్‌ను వెనక్కి తీసుకోవాలని డిమాండ్ చేశారు.

ఈ వ్యవహారంపై విచారణ జరిపించాలని కోరుతూ కేంద్ర సమాచార ప్రసార శాఖ మంత్రి అశ్విని వైష్ణవ్‌కు చంద్రకుమార్ బోస్ లేఖ రాశారు. టీజర్‌తో పాటు చిత్రంలోనూ బోస్‌కు సంబంధించిన అంశాలను బాధ్యతాయుతంగా చూపించాలని కోరారు. ఈ విషయంపై చిత్ర బృందం స్పందన తెలియాల్సి ఉంది.