కోదాడలో అక్రమ గ్యాస్ రీఫిల్లింగ్ సిలిండర్ పేలుడు; భూకంపమని భయపడిన స్థానికులు

సూర్యాపేట జిల్లా కోదాడలోని రంగ థియేటర్ గల్లీలో అర్ధరాత్రి గ్యాస్ సిలిండర్ పేలింది. ఓ దుకాణంలో అక్రమంగా గ్యాస్ రీఫిల్లింగ్ చేస్తుండగా ఈ ప్రమాదం జరిగింది.

పేలుడు ధాటికి షాపుతో పాటు పక్కనే ఉన్న ఇళ్లలోని వస్తువులు చిందరవందరగా మారాయి. ఒక్కసారిగా పెద్ద శబ్దం రావడంతో స్థానికులు భూకంపం వచ్చిందని భావించి భయంతో బయటకు పరుగులు తీశారు.

ఘటనాస్థలానికి చేరుకున్న పోలీసులు దర్యాప్తు ప్రారంభించారు. అక్రమ గ్యాస్ రీఫిల్లింగ్ వల్లే ఈ పేలుడు సంభవించినట్లు ప్రాథమికంగా తెలిసింది.

అయితే మెగా గ్యాస్ సంస్థ ప్రతినిధులు సంఘటనా స్థలానికి చేరుకుని, తమ గ్యాస్ సరఫరా లైన్లో ఎలాంటి లీకేజీ లేదని స్పష్టం చేశారు. ఈ పేలుడులో ఎవరికీ గాయాలు కాలేదని అధికారులు తెలిపారు.