జీహెచ్ఎంసీ క్యూఆర్ కోడ్ ద్వారా ఉచిత భారీ వ్యర్థాల సేకరణ

గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) నగరంలో భారీ వ్యర్థాల నిర్వహణ కోసం కొత్త సేవను ప్రారంభించింది.

ఇళ్లలో పేరుకుపోయే పాత ఫర్నిచర్, విరిగిన మంచాలు, పరుపులు, సోఫాలు, ఎలక్ట్రానిక్ వేస్ట్ వంటి భారీ చెత్తను ఉచితంగా ఇంటి వద్ద నుంచే సేకరించేందుకు క్యూఆర్ కోడ్ విధానాన్ని అందుబాటులోకి తెచ్చింది.

జీహెచ్ఎంసీ విడుదల చేసిన క్యూఆర్ కోడ్‌ను స్కాన్ చేసి వివరాలు నమోదు చేస్తే, సంబంధిత సిబ్బంది ఆ ఇంటికి వెళ్లి వ్యర్థాలను తీసుకెళ్తారు. ఇందుకు ఎలాంటి రుసుము లేదు. ఈ సేవ హైదరాబాద్ నగరంలోని ఆరు జోన్ల పరిధిలో అమలవుతోంది.

వర్షాకాలంలో నాలాలు, డ్రైనేజీల్లో భారీ వ్యర్థాలు పేరుకుపోవడంతో నగరంలో చిన్న వర్షానికే రోడ్లు జలమయం అవుతున్నాయి. ఈ సమస్యకు శాశ్వత పరిష్కారంగా ఈ కార్యక్రమాన్ని చేపట్టినట్లు జీహెచ్ఎంసీ అధికారులు తెలిపారు.

పాత ఫర్నిచర్, మంచాలు, పరుపులు, టీవీలు, కంప్యూటర్ల వంటి వస్తువులను సైతం ఈ సేవ ద్వారా ఉచితంగా తొలగించుకోవచ్చు. ప్రజలు రోడ్లపై లేదా నాలాల్లో చెత్త వేయాల్సిన అవసరం తప్పింది.