పాత ఫర్నిచర్, మ్యాట్రస్‌లను ఉచితంగా తీసుకెళ్లేందుకు జీహెచ్ఎంసీ క్యూఆర్ కోడ్ సేవ

హైదరాబాద్‌లో పాత ఫర్నిచర్, మ్యాట్రస్‌లు, మరియు ఇతర గృహోపకరణాలను ఉచితంగా తీసుకెళ్లేందుకు గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) క్యూఆర్ కోడ్ సేవను ప్రారంభించింది.

నివాసితులు నిర్దిష్ట క్యూఆర్ కోడ్‌ను స్కాన్ చేసి బుకింగ్ చేసుకోవచ్చు. ఆ తర్వాత జీహెచ్ఎంసీ వాహనం నేరుగా ఇంటికి వచ్చి అనవసరమైన వస్తువులను తీసుకెళ్తుంది. ఇందుకు ఎలాంటి రుసుము చెల్లించాల్సిన అవసరం లేదు.

చాలా మంది నివాసితులు పాత సామానును రోడ్ల పక్కన లేదా నాలాల్లో పడేస్తుంటారు. దీంతో నాలాలు అడ్డుపడి వర్షాకాలంలో వరదలు సంభవిస్తాయి. ఈ సేవ ద్వారా ఆ సమస్యకు చెక్ పడుతుంది.

జీహెచ్ఎంసీ అధికారులు రెండు వారాలుగా డ్రెయినేజీల శుభ్రత చేపడుతున్నారు. ఈ క్రమంలో టన్నుల కొద్దీ ప్లాస్టిక్, కేబుల్ వైర్లు తొలగించామని తెలిపారు. సేకరించిన పాత వస్తువులను రీసైక్లింగ్ సెంటర్లకు పంపిస్తున్నట్టు వెల్లడించారు.

క్యూఆర్ కోడ్ సేవకు నివాసితుల నుండి సానుకూల స్పందన వస్తోంది.