గోదావరి నది ఉగ్రరూపం: గండిపోచమ్మ వద్ద వరద ప్రవాహం, అధికారుల హెచ్చరిక

అల్లూరి సీతారామరాజు జిల్లా దేవీపట్నం మండలంలోని గండిపోచమ్మ వద్ద గోదావరి నది ఉధృతంగా ప్రవహిస్తోంది. నది ఒడ్డున చెట్లు, రాళ్లు, ఘాట్లు వరదనీటిలో మునిగాయి. ఈ ప్రాంతం ప్రముఖ పుణ్యక్షేత్రం కావడంతో అక్కడున్న భక్తులు భయంతో పరుగులు తీశారు. అధికారులు భక్తులు రావద్దని హెచ్చరించారు.

మహారాష్ట్రలోని నాసిక్, పూణే, ముంబై ప్రాంతాల్లో ఎడతెరిపి లేకుండా కురుస్తున్న భారీ వర్షాల కారణంగా గోదావరిలోకి భారీగా వరదనీరు చేరుతోంది. ఎగువ ప్రాంతాల నుంచి నీరు వచ్చి చేరడంతో నదిలో నీటిమట్టం రోజురోజుకూ పెరుగుతోంది. ప్రస్తుతం నది భారీ అలలతో ఉప్పొంగుతూ ముందుకు దూసుకెళ్తోంది.

విపత్తు నిర్వహణ శాఖ సిబ్బందిని అప్రమత్తం చేశారు. లోతట్టు ప్రాంతాలపై ప్రత్యేక దృష్టి పెట్టారు. నీటిమట్టాన్ని అధికారులు నిరంతరం పరిశీలిస్తున్నారు. అవసరమైన చోట సహాయ చర్యలకు అన్ని శాఖలు సమన్వయంతో సిద్ధంగా ఉన్నాయి.

ప్రజలకు పలు హెచ్చరికలు జారీ చేశారు. గోదావరి తీర ప్రాంత ప్రజలు అప్రమత్తంగా ఉండాలని సూచించారు. చేపల వేటకు వెళ్లే మత్స్యకారులు నదిలో పడవలను దించవద్దని స్పష్టం చేశారు. చిన్న పిల్లలను నది ఒడ్డుకు తీసుకెళ్లకుండా తల్లిదండ్రులు శ్రద్ధ తీసుకోవాలని విజ్ఞప్తి చేశారు.

సోషల్ మీడియాలో వచ్చే అసత్య ప్రచారాలను నమ్మవద్దని, అధికారిక సమాచారాన్ని మాత్రమే పాటించాలని అధికారులు కోరారు. అత్యవసర పరిస్థితుల్లో స్థానిక అధికారులకు సమాచారం ఇవ్వాలని సూచించారు. ఎగువ ప్రాంతాల్లో వర్షాలు కొనసాగితే వరద ప్రవాహం మరింత పెరిగే అవకాశం ఉందని భావిస్తున్నారు.