వరంగల్ జిల్లాలో పొలంలో బంగారు ఆభరణాలు: యాజమాన్యంపై వివాదం

వరంగల్ జిల్లా చెన్నారావుపేట మండలం కోపాకులపాడు గ్రామంలో పొలంలో దుక్కి దున్నుతుండగా బంగారు ఆభరణాలు బయటపడ్డాయి. ప్రతాప్ రెడ్డి అనే రైతు తన ఆరు ఎకరాల భూమిని బాలు అనే కౌలు రైతుకు ఇచ్చారు. బాలు పొలంలో నాగలితో దుక్కి దున్నుతుండగా నాగలికి బంగారు ఆభరణాలు తగిలాయి. ఆయన వాటిని ఇంటికి తీసుకెళ్లారు.

అయితే, దొరికిన బంగారంలో వాటా కోసం కౌలు రైతు, కూలీల మధ్య వాగ్వాదం జరిగింది. విషయం గ్రామంలో వ్యాపించడంతో భూయజమాని ప్రతాప్ రెడ్డి కౌలు రైతు, కూలీలను పిలిచి వివాదం పరిష్కరించే ప్రయత్నం చేశారు. అదే సమయంలో, ఆ భూమికి మాజీ యజమాని అయిన జయపాల్ రెడ్డి తనకు కూడా వాటా కావాలంటూ పోలీసులకు ఫిర్యాదు చేశారు. పోలీసులు విచారణ ప్రారంభించారు.

గ్రామస్తులు ఆ ప్రాంతంలో కాకతీయుల కాలానికి చెందిన పురాతన ఆలయాలు, నిర్మాణాలు ఉండేవని చెబుతున్నారు. అందుకే ఇంకా చాలా నిధులు ఉండొచ్చనే ప్రచారం జరుగుతోంది. అయితే, అధికారులు ఎటువంటి అనధికార తవ్వకాలు చేయవద్దని హెచ్చరించారు. పురాతన వస్తువులు దొరికితే వాటిని దాచడం, అమ్మడం లేదా పంచుకోవడం చట్టరీత్యా నేరమని స్పష్టం చేశారు.