గుజరాత్: వల్సాడ్, నర్మదాలో వరదలు.. చిక్కుకున్న వారిని రక్షించిన అధికారులు

గుజరాత్‌లో కురుస్తున్న భారీ వర్షాలతో వల్సాడ్ జిల్లా ఔరంగా నదికి వరద వచ్చింది. నది దాటుతున్న కొందరు వ్యక్తులు ఒక్కసారిగా పెరిగిన నీటి ప్రవాహంలో చిక్కుకుపోయి సహాయం కోరారు.

సమాచారం అందగానే వల్సాడ్ అగ్నిమాపక, విపత్తు నిర్వహణ బృందాలు రెస్క్యూ వాహనాలు, బోట్లు, లైఫ్ జాకెట్లతో ఘటనాస్థలికి చేరుకున్నాయి. ప్రమాదకరమైన నదీ ప్రవాహంలో తాళ్ల సాయంతో దిగి, చిక్కుకున్న ప్రతి ఒక్కరినీ రక్షించి ఒడ్డుకు చేర్చారు. సకాలంలో స్పందించడంతో పెద్ద ప్రమాదం తప్పిందని అధికారులు తెలిపారు.

నర్మదా జిల్లా తిలక్వాడ తాలూకాలోని గౌచర్య గ్రామంలో వరద ఉదృతిలో చిక్కుకున్న ఒక వ్యక్తిని ఎస్డిఆర్ఎఫ్ బృందం సురక్షితంగా రక్షించింది. భారీ వర్షాలతో నది ఉదృతి పెరగడంతో స్థానిక యంత్రాంగం వేగంగా స్పందించి రక్షణ చేపట్టింది.

ప్రస్తుతం ఔరంగా నది ప్రమాదకర స్థాయిలో ప్రవహిస్తోంది. దీంతో తీర ప్రాంత, లోతట్టు ప్రాంతాల ప్రజలను అధికారులు అప్రమత్తం చేశారు. నదులు, వాగులు దాటే ప్రయత్నాలు చేయవద్దని, అత్యవసర సహాయానికి నియంత్రణ గదిని సంప్రదించాలని జిల్లా యంత్రాంగం సూచించింది.