గుజరాత్‌లో భారీ వరదలు: వేలాది మంది తరలింపు, కార్లు మునిగిపోయాయి

దక్షిణ గుజరాత్‌లో ఎడతెరిపి లేకుండా కురుస్తున్న భారీ వర్షాల కారణంగా తీవ్రమైన వరదలు సంభవించాయి. చాలా గ్రామాలు నీట మునిగిపోయాయి, ఇళ్ళు కూలిపోయాయి, రోడ్లపై నదుల్లా నీరు ప్రవహించింది.

వల్సాడ్ జిల్లాలోని ఒక పార్కింగ్ ప్రాంతంలో సుమారు 50 కార్లు పూర్తిగా నీటిలో మునిగిపోయినట్టు సోషల్ మీడియాలో వీడియోలు వైరల్ అవుతున్నాయి. బ్రిడ్జిలు కూలిపోవడం, రవాణా వ్యవస్థ స్తంభించడంతో జనజీవనం అస్తవ్యస్తంగా మారింది. పాఠశాలలు మూతపడ్డాయి.

అధికారులు ప్రభావిత ప్రాంతాల నుంచి వేలాది మందిని సురక్షిత ప్రదేశాలకు తరలించారు. రెస్క్యూ ఆపరేషన్లు కొనసాగుతున్నాయి, అయితే ఇంకా వర్షాలు కురుస్తూనే ఉండటంతో సహాయ చర్యలకు ఆటంకం ఏర్పడుతోంది. గుజరాత్ ప్రభుత్వం లోతట్టు ప్రాంతాల ప్రజలను అప్రమత్తంగా ఉండాలని కోరింది. రాష్ట్రంలోని పలు జిల్లాల్లో ఇదే పరిస్థితి కనిపిస్తోంది.