గుజరాత్‌లో భారీ వర్షాలు: సూరత్, నవసారిలో వరదలు, స్కూళ్లు మూత, 30 మంది ప్రయాణికుల రక్షణ

దక్షిణ గుజరాత్‌లోని సూరత్, నవసారి జిల్లాల్లో గత 24 గంటల్లో కురిసిన భారీ వర్షానికి లోతట్టు ప్రాంతాలు జలమయమయ్యాయి. నవసారి నేషనల్ హైవేపై ఖరేల్ ఓవర్‌బ్రిడ్జి సమీపంలో సర్వీస్ రోడ్‌పై ఒక కారు వరదనీటిలో చిక్కుకుంది. అదే ప్రాంతంలో 30 మంది ప్రయాణికులతో ఒక ప్రైవేటు బస్సు కూడా నీటిలో ఇరుక్కుంది. స్థానికులు సహాయం చేయడంలో విఫలమవడంతో అగ్నిమాపక సిబ్బంది ఘటనాస్థలికి చేరుకుని రెస్క్యూ చర్యలు చేపట్టారు. కారులో, బస్సులో ఉన్న ప్రయాణికులందరినీ సురక్షితంగా బయటకు తీశారు. ఎవరికీ గాయాలు కాలేదు.

భారీ వర్షాల నేపథ్యంలో సూరత్ మున్సిపల్ కార్పొరేషన్ పరిధిలోని అన్ని పాఠశాలలు, కాలేజీలకు మంగళవారం సెలవు ప్రకటించారు. నవసారి జిల్లాలోనూ స్కూలు-కాలేజీలు మూతవేశారు. గ్రామీణ ప్రాంతాల్లోని పాఠశాలల విషయంలో స్థానిక పరిస్థితులను బట్టి ప్రధానోపాధ్యాయులే నిర్ణయం తీసుకోవాలని అధికారులు సూచించారు. గత 12 గంటల్లో రెండు నగరాల్లో 15 అంగుళాలకు పైగా వర్షపాతం నమోదైంది. దీంతో చాలా చోట్ల నీరు నిలిచి రాకపోకలకు అంతరాయం కలిగింది. జనజీవనం అస్తవ్యస్తంగా మారింది.

వాతావరణ శాఖ (IMD) రాబోయే 12 నుంచి 24 గంటల్లో భారీ నుంచి అతి భారీ వర్షం కురిసే అవకాశం ఉన్నట్లు ఆరెంజ్ హెచ్చరిక జారీ చేసింది. గత రెండు గంటలుగా వర్షం ఆగినా రాత్రిపూట మళ్లీ వర్షం కురిస్తే పరిస్థితి మరింత దిగజారే అవకాశం ఉంది. అధికార యంత్రాంగం అప్రమత్తంగా ఉంది.