గుండి వాగుపై వంతెన కోసం యువకుల సైకిల్ యాత్ర.. గోదావరిఖని చేరుకుంది

కొమరం భీం ఆసిఫాబాద్ జిల్లాలోని గుండి గ్రామంలో ఉన్న వాగుపై వంతెన నిర్మించాలని కోరుతూ గ్రామ యువకులు చేపట్టిన సైకిల్ యాత్ర పెద్దపల్లి జిల్లా గోదావరిఖనికి చేరుకుంది. 26వ తేదీన ప్రారంభమైన ఈ యాత్ర మరుసటి రోజు గోదావరిఖని చేరుకుందని యువకులు తెలిపారు.

గుండి గ్రామం ఆసిఫాబాద్ మండలం, జిల్లా కేంద్రానికి మూడు కిలోమీటర్ల దూరంలో ఉంది. కానీ గ్రామం ఎదురుగా ఉన్న పెద్ద వాగు కారణంగా జిల్లా కేంద్రానికి వెళ్లాలంటే 30 కిలోమీటర్లు ప్రయాణించాల్సి వస్తోంది. ఈ వంతెన కోసం గ్రామస్థులు 20 సంవత్సరాలుగా కోరుతున్నారు. ఇప్పటికీ నిర్మాణం పూర్తికాలేదని వారు చెప్పారు.

వంతెన లేకపోవడం వల్ల చదువు, వైద్యం, ఉపాధి కోసం తీవ్ర ఇబ్బందులు పడుతున్నామని యువకులు తెలిపారు. వర్షాకాలంలో గ్రామం నుంచి ఎటూ వెళ్లలేని పరిస్థితి ఏర్పడుతుందని వారు చెప్పారు. విద్యార్థులు వాగు దాటి పాఠశాలకు వెళ్లాల్సి వస్తోందని, ఉద్యోగం, వైద్యం కోసం వెళ్లేవారు ఎక్కువ ఇబ్బందులు పడుతున్నారని పేర్కొన్నారు.

ఉమ్మడి ఆంధ్రప్రదేశ్ నుంచి తెలంగాణ రాష్ట్రం ఏర్పడిన తర్వాత ప్రభుత్వాలు మారినా తమ బాధ మారలేదని గ్రామస్థులు అన్నారు. ఈ సమస్యను CM రేవంత్ రెడ్డి దృష్టికి తీసుకెళ్తామని వారు తెలిపారు. అధికారుల వైఖరిని నిరసిస్తూ సెక్రటేరియట్ వరకు సైకిల్ యాత్ర కొనసాగుతుందని యువకులు చెప్పారు. తమ డిమాండ్‌ను అధికారులకు, ప్రజాప్రతినిధులకు తెలియజేయడానికే ఈ యాత్ర చేపట్టినట్లు వారు తెలిపారు. తమ జిల్లా దేశంలో రెండో backward district అని గ్రామస్థులు పేర్కొన్నారు.