HCA నిధుల వివాదం: 69 కోట్లు బదిలీ అయ్యాయన్న ఆరోపణలను మంత్రి వివేక్ వెంకటస్వామి ఖండన

హైదరాబాద్ క్రికెట్ అసోసియేషన్ (HCA) నిధుల విషయంలో చేస్తున్న ఆరోపణలపై మంత్రి వివేక్ వెంకటస్వామి స్పందించారు. సోమాజిగూడా ప్రెస్ క్లబ్‌లో ఏర్పాటు చేసిన మీడియా సమావేశంలో ఆయన ఈ వివరాలు వెల్లడించారు.

HCA నుంచి విశాఖ ఇండస్ట్రీస్‌కు 69 కోట్ల రూపాయలు బదిలీ అయ్యాయన్న ప్రచారం తప్పుడు దని మంత్రి స్పష్టం చేశారు. గతంలో HCA చేసుకున్న ఒప్పందాన్ని ఉల్లంఘించినందుకు సుప్రీం కోర్టు విశాఖ ఇండస్ట్రీస్‌కు 36 కోట్ల రూపాయల పరిహారం చెల్లించాలని తుది తీర్పు ఇచ్చిందని తెలిపారు. అయితే ఆ మొత్తం కూడా ఇంకా చెల్లించలేదని, దీనిని తప్పుగా ప్రచారం చేస్తున్నారని ఆయన ఆరోపించారు.

గురువా రెడ్డి అనే వ్యక్తి లోకాయుక్తలో ఫిర్యాదు చేస్తూ, HCA లో అక్రమాలు జరిగాయని ఆరోపించిన నేపథ్యంలో ఆయనపై పరువు నష్టం నోటీసులు పంపినట్లు మంత్రి చెప్పారు. త్వరలోనే కోర్టులో దావా కూడా వేస్తామని హెచ్చరించారు. ఇదిలా ఉండగా, పూర్వం హైకోర్టు IPL హక్కులు విశాఖ ఇండస్ట్రీస్‌కు ఇస్తూ ఆదేశాలు జారీ చేయగా, HCA సుప్రీం కోర్టుకు వెళ్లి తనకు అనుకూలంగా తీర్పు తెచ్చుకుందని వివరించారు.

పరిహారం కింద వచ్చే నిధులన్నింటినీ తెలంగాణలో గ్రామీణ స్థాయిలో క్రికెట్ అభివృద్ధికే పూర్తిగా వినియోగిస్తామని మంత్రి స్పష్టం చేశారు. గురువా రెడ్డి చేసిన ఆరోపణలు నిరాధారమని, వాటిని తీవ్రంగా ఖండిస్తున్నట్లు తెలిపారు.