తిరుమలలో భక్తుల రద్దీ, సర్వదర్శనానికి 18 గంటల సమయం

తిరుమలలో భక్తుల రద్దీ కొనసాగుతోంది. గురువారం వైకుంఠం క్యూ కాంప్లెక్స్ అన్ని కంపార్ట్మెంట్లు నిండాయి. క్యూ లైన్ శిలాతోరణం వరకు విస్తరించింది.

సర్వదర్శనం క్యూలో ప్రవేశించిన భక్తులకు దర్శనానికి 18 గంటల సమయం పడుతుందని టీటీడీ అధికారులు తెలిపారు. రూ.300 టికెట్లు ఉన్న భక్తులకు 6 గంటలు, సర్వదర్శనం టోకెన్లు ఉన్న వారికి 8 గంటలు సమయం పడుతుంది. టోకెన్లు లేకుండా ప్రవేశించిన వారికి 18 గంటల సమయం పట్టింది.

బుధవారం తిరుమలలో 82 వేల మందికి పైగా భక్తులు శ్రీవారిని దర్శించుకున్నారు. హుండి ఆదాయం రూ.5.15 కోట్లు నమోదయ్యింది. 4.25 లక్షల లడ్డూలు అమ్ముడుపోగా, 2.57 లక్షల మంది అన్నప్రసాదం స్వీకరించారు.

తిరుమల తిరుపతి దేవస్థానం మరో ప్రకటన చేసింది. ఈ ఏడాది అధిక మాసం రావడంతో సెప్టెంబర్లో వార్షిక బ్రహ్మోత్సవాలు, అక్టోబర్లో నవరాత్రి బ్రహ్మోత్సవాలు జరగనున్నాయి. అధికార యంత్రాంగం ఇప్పటి నుంచే ప్రణాళికలు రూపొందిస్తోంది.