హైదరాబాద్‌లో భారీ వర్షం; రాబోయే రెండు రోజులు వాన, ఈదురుగాలులు – వాతావరణ శాఖ హెచ్చరిక

హైదరాబాద్ నగరంలో ఈ రోజు సాయంత్రం పలు ప్రాంతాల్లో భారీ వర్షం కురిసింది. బంజారా హిల్స్, జూబ్లీ హిల్స్, పంజాగుట్ట, బేగంపేట, సికింద్రాబాద్, ఎల్బీ నగర్, మలక్‌పేట, దిల్‌షుక్‌నగర్ తోపాటు ఐటీ కారిడార్‌లో కూడా వర్షం పడింది. వర్షం కారణంగా నగరంలోని పలు రహదారులపై నీరు నిలిచి ట్రాఫిక్ జామ్ ఏర్పడింది; ఇళ్లకు తిరిగి వెళ్తున్న ఉద్యోగులు ఇబ్బందులు ఎదుర్కొన్నారు.

వాతావరణ శాఖ ప్రకారం, రాబోయే రెండు రోజుల పాటు హైదరాబాద్ సహా తెలంగాణ వ్యాప్తంగా మోస్తరు నుంచి భారీ వర్షాలు కురిసే అవకాశం ఉంది. 30 నుంచి 40 కి.మీ. వేగంతో ఈదురుగాలులు వీచుతాయని, ఉరుములు, మెరుపులతో కూడిన వాన ఉంటుందని హెచ్చరించారు. లోతట్టు ప్రాంతాల ప్రజలు అప్రమత్తంగా ఉండాలని, మ్యాన్‌హోల్స్, విద్యుత్ స్తంభాలకు దూరంగా ఉండాలని సూచించారు.

గత 24 గంటల్లో తెలంగాణలోని పలు జిల్లాల్లో వర్షపాతం నమోదైంది. ములుగు జిల్లాలో 11 సెం.మీ, హనుమకొండలో 7 సెం.మీ, వరంగల్‌లో 6 సెం.మీ, నాగర్‌కర్నూల్‌లో 4 సెం.మీ, మహబూబ్‌నగర్‌లో 4 సెం.మీ చొప్పున వర్షం పడింది. జూన్ నుంచి రాష్ట్రంలో వర్షాలు ఆలస్యమవడంతో రైతులు నారు వేయలేకపోయారు; ప్రస్తుతం పడిన వానలతో కొంత ఊరట లభించింది.

ఎడతెరిపి లేని వర్షానికి చెట్లు కూలడంతో హైడ్రా, మున్సిపల్ అధికారులు రహదారులపై పడిన చెట్లను తొలగిస్తున్నారు. ఉత్తర ఒడిస్సాలో ఏర్పడిన అల్పపీడనమే ఈ వర్షాలకు కారణమని వాతావరణ శాఖ వివరించింది. రాబోయే గంటలో హైదరాబాద్‌లో మరోసారి భారీ వాన పడే అవకాశం ఉందని అధికారులు తెలిపారు.