ఉత్తరాది రాష్ట్రాల్లో భారీ వర్షాలు: తూర్పు యూపీ, బెంగాల్‌లో మరింత వర్షం

ఉత్తరాది రాష్ట్రాల్లో భారీ వర్షాలు ఆగడం లేదు. ఉత్తరాఖండ్, హిమాచల్ ప్రదేశ్‌లలో వరదలు, కొండచరియలు విరిగిపడడంతో జనజీవనం స్తంభించింది. ఢిల్లీలోని లోతట్టు ప్రాంతాలు జలమయమయ్యాయి.

ఉత్తరాఖండ్‌లోని రుద్రప్రయాగ్ జిల్లాలో కుండపోత వర్షాలకు అలకానంద, మందాకిని నదులు పొంగి ప్రవహిస్తున్నాయి. ముంపు ప్రాంతాల నుంచి ప్రజలను సురక్షిత ప్రాంతాలకు తరలించారు. జిల్లాలోని పాఠశాలలు మూసివేశారు. బద్రీనాథ్ మార్గంలో కొండచరియలు పడే ప్రమాదం ఉండడంతో అధికారులు ప్రజలను అప్రమత్తంగా ఉండాలని సూచించారు.

హిమాచల్ ప్రదేశ్‌లో భారీ వర్షాల కారణంగా చెట్లు నేలకొరిగాయి, రోడ్లపై భారీ ట్రాఫిక్ జామ్ నెలకొంది. అధికారులు చెట్లను తొలగించేందుకు శ్రమిస్తున్నారు. న్యూ సిమ్లా సమీపంలోని రాజధానా గ్రామంలో వాహనాలు తీవ్రంగా దెబ్బతిన్నాయి. ఉత్తరకాశీ జిల్లాలో గంగోత్రి హైవే బందు కావడంతో చార్ ధామ్ యాత్రకు అంతరాయం కలిగింది.

మధ్య, వాయువ్య భారతంపై నెలకొన్న అల్పపీడనం తీవ్రత తగ్గినట్లు ఐఎండి శాస్త్రవేత్త నరేశ్ తెలిపారు. అయితే, ఆ ప్రభావంతో తూర్పు ఉత్తరప్రదేశ్, బీహార్, పశ్చిమ బెంగాల్, సిక్కిం, ఈశాన్య రాష్ట్రాల్లో రాబోయే రెండు రోజులు భారీ వర్షాలు కురిసే అవకాశం ఉందన్నారు.

ఈ ఏడాది చాలా రాష్ట్రాల్లో లోటు వర్షాపాతం నమోదైనట్లు ఐఎండి వెల్లడించింది. ఎల్‌నినో ప్రభావం కొనసాగుతోందని, రైతులు అప్రమత్తంగా ఉండాలని సూచించారు.