తెలంగాణలో భారీ వర్షాలు: పలు జిల్లాలకు వాతావరణ శాఖ అలర్ట్

తెలంగాణలో ఈరోజు విస్తారంగా భారీ వర్షాలు కురిసే అవకాశం ఉందని వాతావరణ శాఖ అలర్ట్ జారీ చేసింది. ముఖ్యంగా ఉత్తర, తూర్పు తెలంగాణ జిల్లాల్లో మోస్తరు నుంచి భారీ వర్షాలు కురుస్తాయని అంచనా.

ఆదిలాబాద్, నిర్మల్, నిజామాబాద్, జగిత్యాల, మంచిర్యాల, పెద్దపల్లి, భూపాలపల్లి, కరీంనగర్, ములుగు, భద్రాద్రి కొత్తగూడెం జిల్లాల్లో మధ్యాహ్నం తర్వాత నుంచి రాత్రి వరకు భారీ వర్షాలు పడతాయి. సంగారెడ్డి, వికారాబాద్, రంగారెడ్డి, మహబూబ్‌నగర్, మెదక్, కామారెడ్డి, సిద్దిపేట, సిరిసిల్ల, హన్మకొండ, వరంగల్ జిల్లాల్లో తేలికపాటి నుంచి మోస్తరు వర్షాలు కురిసే సూచనలు ఉన్నాయి.

రాజధాని హైదరాబాద్‌లో మధ్యాహ్నం వరకు పొడి వాతావరణం ఉంటుంది. సాయంత్రం నుంచి రాత్రి వరకు నగరంలోని పలు ప్రాంతాల్లో వర్షం పడే అవకాశం ఉంది. వాహనదారులు ట్రాఫిక్ ఇబ్బందులను దృష్టిలో ఉంచుకుని జాగ్రత్తగా ఉండాలని అధికారులు సూచించారు.

ఈ ఏడాది నైరుతి ఋతుపవనాలు జూన్ 8న తెలంగాణలోకి ప్రవేశించినప్పటికీ, వాటి కదలిక మందకోడిగా ఉండడంతో జూన్, జూలై నెలల్లో సరిపడా వర్షాలు కురవలేదు. ఫలితంగా రాష్ట్రంలో వర్షపాతం లోటు నమోదైంది. గత రెండు మూడు రోజులుగా కురుస్తున్న వర్షాలు రైతులకు కొంత ఉపశమనం కలిగించాయి.

వాతావరణ శాఖ అంచనాల ప్రకారం, ఈ భారీ వర్షాలు మరో రెండు మూడు రోజుల పాటు కొనసాగే అవకాశం ఉంది.