ఎల్ నినో ప్రభావంపై హోమ్ మంత్రి అనిత సమీక్ష: రాయలసీమలో తీవ్ర వర్షాభావం

హోమ్ మంత్రి అనిత ఉన్నతస్థాయి అధికారులతో విపత్తుల నిర్వహణ సమీక్ష నిర్వహించారు. ఎల్ నినో ప్రభావంతో రాయలసీమ జిల్లాలు ఎక్కువగా దెబ్బతింటాయని అన్నారు. అనంతపురం, శ్రీ సత్యసాయి, అన్నమయ్య జిల్లాల్లో తీవ్ర వర్షాభావం నమోదైందని తెలిపారు.

విపత్తుల వల్ల ప్రాణనష్టం జరగకుండా ఉండేందుకే లక్ష్యంగా పనిచేయాలని అధికారులను ఆదేశించారు. జిల్లా, రాష్ట్ర స్థాయిల్లో ప్రత్యేక కంట్రోల్ రూమ్లు ఏర్పాటు చేయాలని సూచించారు. రైతులకు ప్రత్యామ్నాయ పంటలపై అవగాహన కల్పించాలని, వరద ముప్పున్న లోతట్టు ప్రాంతాల ప్రజల తరలింపునకు ప్రణాళికలు సిద్ధం చేయాలన్నారు.

పునరావాస కేంద్రాల్లో ఆహారం, తాగునీరు, వైద్య సేవలు అందుబాటులో ఉండేలా చర్యలు తీసుకోవాలని ఆదేశించారు. తాగునీరు, విద్యుత్ వంటి కీలక సేవలకు అంతరాయం కలగకూడదని సూచించారు. పోలీస్, ఫైర్, ఎన్డీఆర్ఎఫ్, ఎస్డీఆర్ఎఫ్ బృందాలు అత్యవసర స్పందనకు సిద్ధంగా ఉండాలని హోమ్ మంత్రి అధికారులకు స్పష్టం చేశారు.