హోండా క్యూసీ-3 ఎలక్ట్రిక్ స్కూటర్ ఆవిష్కరణ: 3 కిలోవాట్ బ్యాటరీ, 145 కిలోమీటర్ల రేంజ్

హోండా మోటార్‌సైకిల్ అండ్ స్కూటర్ ఇండియా (HMSI) తాజాగా క్యూసీ-3 ఎలక్ట్రిక్ స్కూటర్‌ను భారత మార్కెట్‌లో ఆవిష్కరించింది. ఇది ప్రొడక్షన్ స్పెక్ మోడల్‌గా రూపొందింది. కంపెనీ ఇప్పటికే యాక్టివా ఈ, క్యూసీ-1 వంటి ఎలక్ట్రిక్ స్కూటర్లను విడుదల చేయగా, ఈ కొత్త మోడల్ ద్వారా తన ఈవీ పోర్ట్‌ఫోలియోను మరింత విస్తరించింది. క్యూసీ-3 లో ప్రయాణికులకు అవసరమైన స్టోరేజ్ సామర్థ్యం పెంచారు. ఇది 32 లీటర్ల అండర్ సీట్ స్టోరేజ్ ను అందిస్తుంది. ఇంత పెద్ద స్టోరేజ్ సాధారణంగా ఐసీఈ స్కూటర్లలో మాత్రమే కనిపించేది. ఇప్పుడు అదే సౌలభ్యాన్ని ఎలక్ట్రిక్ స్కూటర్‌లోనూ హోండా తీసుకొచ్చింది. స్కూటర్‌లో 3 కిలోవాట్ అవర్ (kWh) ఫిక్స్డ్ బ్యాటరీ ప్యాక్ ఇచ్చారు. ఈ బ్యాటరీని 2 గంటల 40 నిమిషాల వ్యవధిలో పూర్తిగా ఛార్జ్ చేసుకోవచ్చు. ఒకసారి ఫుల్ ఛార్జ్ అయితే 145 కిలోమీటర్ల ఐడీసీ రేంజ్‌ను ఇస్తుంది. ఇందులో 5 అంగుళాల టీఎఫ్‌టీ టచ్‌స్క్రీన్ డిస్‌ప్లే ఉంటుంది. ఇది స్మార్ట్‌ఫోన్ కనెక్టివిటీ, నావిగేషన్, రైడింగ్ డేటా వంటి ఫీచర్లను చూపిస్తుంది. ధర వివరాలు మాత్రం ఇంకా వెల్లడికాలేదు. హోండా త్వరలోనే ధరలను ప్రకటిస్తుందని అంచనా వేస్తున్నారు. మార్కెట్‌లో ఓలా, ఏథర్, టీవీఎస్ వంటి బలమైన పోటీదార్ల నడుమ క్యూసీ-3 ఎలా రాణిస్తుందనేది ఆసక్తికరంగా మారింది. వచ్చే నెలల్లో ఈ స్కూటర్ షోరూమ్ లలో అందుబాటులోకి రానుంది.