హైదరాబాద్ క్లౌడ్ కిచెన్లపై ఫుడ్ సేఫ్టీ అధికారుల తనిఖీ - పలు ఉల్లంఘనలు వెలుగులోకి

హైదరాబాద్‌లోని క్లౌడ్ కిచెన్‌లపై ఫుడ్ సేఫ్టీ అధికారులు తనిఖీలు నిర్వహించారు. తనిఖీల్లో భారీ స్థాయిలో ఉల్లంఘనలు బయటపడ్డాయి. చాలా క్లౌడ్ కిచెన్‌లు FSSAI లైసెన్స్ లేకుండా, గడువు ముగిసిన లైసెన్స్‌లతో నడుస్తున్నట్లు గుర్తించారు. కొన్నింటికి లైసెన్స్‌లే లేవు.

అధికారులు వివిధ క్లౌడ్ కిచెన్‌ల్లో ఎన్నో లోపాలు కనుగొన్నారు. ఎక్స్పైరీ అయిన ఆహార పదార్థాలు, సరైన ఉష్ణోగ్రతలో నిల్వ చేయని చికెన్, మటన్, ఫ్రోజెన్ ఐటమ్స్, లేబులింగ్ లేకుండా నిల్వ ఉంచిన పదార్థాలు కనిపించాయి. ఫ్రిడ్జ్‌లు అపరిశుభ్రంగా ఉన్నాయి. వంటగదులు మురికిగా ఉన్నాయి. చేతులు కడుకునే సదుపాయం లేదు. చెత్త మధ్యలో వంటలు చేస్తున్నారు. కొన్ని చోట్ల పిల్లులు, ఈగలు, బొద్దింకలు, ఎలుకల ఆనవాళ్లు కూడా కనిపించాయి.

ఫుడ్ హ్యాండ్లర్లు గ్లౌజులు, హెయిర్ క్యాప్స్, ఆప్రాన్‌లు లేకుండా వంట చేశారు. మెడికల్ ఫిట్నెస్ సర్టిఫికెట్లు లేవు. నిల్వ నిబంధనలు పాటించడం లేదు. ముడి ఆహారం, వండిన ఆహారం ఒకే చోట ఉంచారు. ఫైర్ సేఫ్టీ, వ్యర్ధాల నిర్వహణ, పురుగుల నివారణ చర్యలు లేవు. ఫుడ్ సేఫ్టీ ప్రమాణాలు పూర్తిగా విస్మరించినట్లు అధికారులు తెలిపారు.

ఈ ఉల్లంఘనలపై అధికారులు నోటీసులు జారీ చేశారు. కొన్ని క్లౌడ్ కిచెన్‌ల లైసెన్స్‌లు సస్పెండ్ చేశారు. నిబంధనలు తీవ్రంగా ఉల్లంఘించిన యూనిట్ల లైసెన్స్‌లను రద్దు చేశారు.

ప్రతి క్లౌడ్ కిచెన్‌కు FSSAI లైసెన్స్, ట్రేడ్ లైసెన్స్ తప్పనిసరి అని అధికారులు స్పష్టం చేశారు. అలాగే రెసిడెన్షియల్ ఇళ్లల్లో కాకుండా అనుమతులు ఉన్న కమర్షియల్ భవనాల్లో మాత్రమే క్లౌడ్ కిచెన్‌లు నడపాలి. చిన్న స్థాయిలో ఇంట్లో నిర్వహించేవారికి అవగాహన కల్పించాల్సిన అవసరం ఉందని, ఫీల్డ్ అధికారులు స్పాట్ ఇన్స్పెక్షన్ చేసి జాగ్రత్తలు చెప్పాలని ఫుడ్ సేఫ్టీ అధికారి వివరించారు.

ఆన్లైన్‌లో ఫుడ్ ఆర్డర్ చేసే వినియోగదారులు అప్రమత్తంగా ఉండాలని సూచించారు. Swiggy, Zomato వంటి యాప్‌లలో కనిపించే రేటింగ్స్‌పై మాత్రమే ఆధారపడవద్దని, ప్రతి లిస్టింగ్‌ను తనిఖీ చేయించాలని నగరవాసులు కోరుతున్నారు. క్లౌడ్ కిచెన్‌లు FSSAI, GHMC నిబంధనలు పాటించడంతో పాటు పరిశుభ్రమైన, నాణ్యమైన ఆహారం అందించాలని అధికారులు హెచ్చరించారు. నిబంధనలు ఉల్లంఘిస్తే కఠిన చర్యలు తీసుకుంటామని స్పష్టం చేశారు.