TG20 2026 లో హైదరాబాద్ e-Champions కి టైటిల్; అభిరద్‌కు ఆరెంజ్ క్యాప్, దేవగౌడ‌కు పర్పుల్ క్యాప్

TG20 మొదటి సీజన్‌లో హైదరాబాద్ e-Champions టైటిల్ గెలుచుకుంది. ఆదివారం ఖమ్మం ఏసెస్‌తో జరిగిన ఫైనల్‌లో 6 వికెట్ల తేడాతో విజయం సాధించింది. ఈ సీజన్ మొత్తం ఆ జట్టు ఆధిపత్యం కనబరిచింది.

ఉప్పల్ స్టేడియం వేదికగా జరిగిన లీగ్ దశలో ఏడు మ్యాచ్‌లు ఆడి, ఏడింటిలోనూ విజయం సాధించింది. పాయింట్ల పట్టికలో అగ్రస్థానంలో నిలిచి ప్లే ఆఫ్స్‌కు అర్హత సాధించిన తొలి జట్టుగా నిలిచింది. క్వాలిఫయర్-1లో ఖమ్మం ఏసెస్ చేతిలో 10 పరుగుల తేడాతో ఓడిపోయింది. అయితే క్వాలిఫయర్-2లో కరీంనగర్ డైమండ్స్‌పై 8 వికెట్ల తేడాతో నెగ్గి ఫైనల్‌కు చేరుకుంది.

ఫైనల్‌లో క్వాలిఫయర్-1 ఓటమికి ప్రతీకారం తీర్చుకున్న హైదరాబాద్, ఖమ్మంను 6 వికెట్ల తేడాతో ఓడించింది. కెప్టెన్ అభిరద్ రెడ్డి 10 మ్యాచ్‌ల్లో 549 పరుగులు చేసి ఆరెంజ్ క్యాప్ గెలుచుకున్నాడు. ఈ సీజన్‌లో 500 పరుగుల మార్కు చేరిన ఏకైక బ్యాటర్ కూడా అతనే. బౌలర్ అజయ్ దేవగౌడ 10 మ్యాచ్‌ల్లో 21 వికెట్లు తీసి పర్పుల్ క్యాప్ సొంతం చేసుకున్నాడు.