45 కేసుల హిస్టరీ షీటర్‌ను బావమరిది హత్య; ఇన్‌స్టాగ్రామ్‌లో లైవ్ చేసిన నిందితుడు

హైదరాబాద్‌లో 45 కేసులు, మూడు హత్య కేసులు ఉన్న హిస్టరీ షీటర్ దాసరి సురేందర్ (సూరి)ను అతడి బావమరిదిగా చెప్పుతున్న అఫ్రోజ్ హత్య చేశాడు. గతంలో సూరి చేసిన రెండు హత్యలకు పగతో ఈ హత్య జరిగినట్లు పోలీసులు తెలిపారు.

గత నెలలో ఒక రోజు రాత్రి, సూరి తన రెండో భార్య పూజతో కలిసి ఆమె అన్నయ్య గోవిందు పుట్టిన రోజు వేడుకకు నందనవనం గణేశ్‌నగర్‌కు వచ్చాడు. అక్కడ ముందే మాటు వేసి ఉన్న అఫ్రోజ్, సురేందర్ ముఖంపై పెప్పర్ స్ప్రే చల్లి కత్తితో దాడి చేశాడు. పారిపోతున్న సూరిని సుమారు అర కిలోమీటరు వెంటాడి మరీ చంపేశాడు.

సూరి 2022లో తన మొదటి భార్య ఫాతిమాను, 2024లో ఆమె పెద్ద తమ్ముడు సల్మాన్‌ను హత్య చేసాడు. ఈ హత్యలకు ప్రతీకారంగా ఫాతిమా చిన్నతమ్ముడు అఫ్రోజ్ ప్రణాళిక వేసి, స్నేహంగా ఉంటూనే హత్యకు పాల్పడ్డాడు.

హత్య అనంతరం అఫ్రోజ్ తానే ఈ హత్య చేసినట్లు ఇన్‌స్టాగ్రామ్‌లో లైవ్‌లోకి వచ్చి, హత్యా స్థలాన్ని వీడియో కాల్‌లో చూపించాడు. దాదాపు నాలుగు నిమిషాలు లైవ్ చేశాడు. సమాచారం అందుకున్న పోలీసులు మీర్‌పేట్ సమీపంలో అఫ్రోజ్‌ను, అతడికి సహకరించిన మరో ముగ్గురు యువకులను అదుపులోకి తీసుకున్నారు.

సంఘటన స్థలంలో సూరి తల్లి కన్నీళ్లతో తన కొడుకును చంపిన వారిని నిందించింది. ఇప్పటికే సూరిపై ఉన్న నేర చరిత్ర కారణంగా గత ఏడాది పోలీసులు నగర బహిష్కరణ చేశారు.