హైదరాబాద్‌లో ఉల్లి ధరలు వారం రోజుల్లోనే డబుల్: సరఫరా తగ్గుదల కారణం

హైదరాబాద్‌లో ఉల్లి ధరలు గత వారంలోనే రెట్టింపు స్థాయికి చేరుకున్నాయి. మలక్‌పేట్ మార్కెట్ యార్డ్ కార్యదర్శి పుష్పలత మాట్లాడుతూ ప్రస్తుతం ఉల్లి ధర ఎక్కువగా ఉందని తెలిపారు.

దీనికి ప్రధాన కారణం సరఫరా తగ్గడమేనని ఆమె పేర్కొన్నారు. గతేడాది కర్నూల్ సీజన్‌లో కురిసిన భారీ వర్షాల వల్ల పంట దెబ్బతింది. ఈసారి ఆంధ్రప్రదేశ్‌లో రైతులు ఉల్లి పంటను పెద్ద ఎత్తున వేయలేదు. దీనివల్ల దిగుబడి బాగా తగ్గింది.

మహారాష్ట్రలో కూడా వర్షాల ప్రభావంతో దిగుబడి తగ్గింది. దీంతో హైదరాబాద్‌కు వచ్చే ఉల్లి సరఫరా గణనీయంగా తగ్గింది. అందుకే రోజురోజుకూ ధరలు పెరుగుతున్నాయని పుష్పలత వివరించారు.

కర్నూల్ సీజన్‌లో తర్వాతి పంట కోతకు వచ్చేందుకు సుమారు రెండు నెలల సమయం పడుతుందని ఆమె తెలిపారు. అప్పుడు సరఫరా మెరుగుపడి ధరలు స్థిరపడే అవకాశం ఉందని పుష్పలత అభిప్రాయపడ్డారు.