హైదరాబాద్ స్కూల్‌లో విద్యార్థుల డైరీలో 'కల్మా' రాసిన టీచర్‌పై బంధువు ఆగ్రహం

హైదరాబాద్‌లోని ఓ ప్రైవేటు స్కూల్‌లో విద్యార్థి బంధువు తీవ్ర నిరసన వ్యక్తం చేసిన ఘటన చర్చనీయాంశమైంది. స్కూల్ డైరీలో 'కల్మా', 'సూర ఫాతిహా' వంటి మతపరమైన అంశాలు రాయడం పట్ల బంధువు స్కూల్ యాజమాన్యాన్ని నిలదీశారు.

'నిన్న సాయంత్రం తన మేనల్లుడిని స్కూల్ నుంచి తీసుకెళ్ళేందుకు వెళ్ళినప్పుడు డైరీలో ఇవి చూశాను. టీచర్ ఇలాంటివి రాయడం పూర్తిగా తప్పు. ఇది విద్య కాదు, మతపరమైన పుస్తకం. విద్యను విద్యగానే ఇవ్వాలి. వివిధ మతాల విద్యార్థులు చదువుకోసం వస్తున్నారు. వారిపై ఏ మతాన్నీ రుద్దడం సరైంది కాదు' అని బంధువు అన్నారు.

స్కూల్ యాజమాన్యం మొదట ఇది 'మతపరమైన ఆచారం, అందరికీ తప్పనిసరి' అని చెప్పినట్లు తెలిపారు. తర్వాత 'పొరపాటున రాశాం' అని చెప్పడంతో పాటు టీచర్‌పై కఠిన చర్యలు తీసుకున్నామని ప్రకటించారు.

'ఇలాంటివి ఎన్ని డైరీల్లో ఉన్నాయో తెలియదు. నేను అన్ని డైరీలు చూపించమని అడిగినా చూపించలేదు. విద్యార్థులకు ఇలాంటివి నేర్పిస్తే వారు బ్రెయిన్‌వాష్ అయ్యే ప్రమాదం ఉంటుంది' అని బంధువు ఆందోళన వ్యక్తం చేశారు.

అలాగే మత గ్రంథాలను సబ్జెక్టులుగా చేయాలనుకుంటే భగవద్గీత, బైబిల్ వంటి అన్నింటినీ సబ్జెక్టులుగా చేయాలని, లేదంటే ఏదీ చేయవద్దని సూచించారు. సంఘటనపై సామాజిక మద్దతు లభించినందుకు కృతజ్ఞతలు తెలిపారు. స్కూల్ యాజమాన్యం టీచర్‌పై తక్షణ చర్యలు తీసుకోవడంతో వివాదం సద్దుమణిగింది.