హైదరాబాద్ జిల్లాలో SIR లక్ష్యానికి దూరంగా: కేవలం 25% డిజిటలైజేషన్ మాత్రమే పూర్తి

హైదరాబాద్ జిల్లాలో స్పెషల్ ఇంటెన్సివ్ రివిజన్ (SIR) ప్రక్రియలో అధికారుల లెక్కలకు, క్షేత్ర స్థాయి పరిస్థితులకు మధ్య భారీ వ్యత్యాసం కనిపిస్తుందని విమర్శలు వెల్లువెత్తుతున్నాయి.

జిల్లాలో మొత్తం 47 లక్షల 36 వేల 669 మంది ఓటర్లకు ఎన్యుమరేషన్ ఫారాలు పంపిణీ చేశామని ఎన్నికల అధికారులు చెబుతున్నారు. అయితే ఇప్పటివరకు సుమారు 12 లక్షల ఫారాలు మాత్రమే డిజిటలైజేషన్ పూర్తయ్యాయి. ఇది మొత్తం ప్రక్రియలో కేవలం 25% మాత్రమే అవుతుంది. దీంతో SIR లక్ష్యానికి ఇంకా చాలా దూరంలో ఉందని స్పష్టమవుతుంది.

పలు ప్రాంతాల్లో ఓటర్లకు, రాజకీయ పార్టీల నేతలకు ఇంకా ఎన్యుమరేషన్ ఫారాలు అందలేదని ఆరోపణలు వస్తున్నాయి. పై అధికారుల ఒత్తిడి కారణంగా క్షేత్ర స్థాయి సిబ్బంది ప్రతి ఇంటికి ఫారాలు అందించినట్టుగా ఆన్లైన్‌లో రికార్డ్ చేశారనే అభియోగాలు కూడా వినిపిస్తున్నాయి. కొందరు BLO లు ఫారాలు ఇచ్చినట్లు ఆన్లైన్‌లో నమోదు చేసినా, సంబంధిత ఓటర్లకు ఆ ఫారాలు నేటికీ అందలేదని ఆరోపణలు ఉన్నాయి.

పలు నియోజకవర్గాల్లో కొత్తగా నియమితులైన బూత్ లెవెల్ అధికారులు (BLO లు) విధులు నిర్వహిస్తున్నారు. మున్సిపల్ సిబ్బందితో పాటు అంగన్వాడీ వర్కర్లు, ఇతర విభాగాల ఉద్యోగులను BLO లుగా నియమించారు. స్థానిక పరిస్థితులు, ఓటర్ల వివరాలు పూర్తిగా తెలియకపోవడంతో ఫీల్డ్ స్థాయిలో ఇబ్బందులు తలెత్తుతున్నాయని విమర్శలు వస్తున్నాయి.

ఇప్పటివరకు 11 లక్షల 52 వేల మంది ఓటర్లు తమ చిరునామాలో లేరని, ఇతర ప్రాంతాలకు మారారని లేదా మరణించారని అధికారులు గుర్తించారు. ఇది మొత్తం ఓటర్లలో దాదాపు 24% అవుతుంది. ఈ ఓటర్ల పేర్లు తుది జాబితాలో చేర్చబడే అవకాశం లేదని అధికారులు స్పష్టం చేస్తున్నారు. మొత్తం జిల్లాలో 25% మంది ఓటర్ల జాబితా నుండి తొలగింపబడే అవకాశం కనిపిస్తుందని విశ్లేషకులు పేర్కొంటున్నారు.

కొన్ని ప్రాంతాల్లో సాంకేతిక సమస్యల కారణంగా ఆన్లైన్‌లో వివరాలు నమోదు చేయడం ఇబ్బందికరంగా మారుతుందని తెలుస్తుంది. మొత్తంగా SIR ప్రక్రియ అధికారుల లక్ష్యాలకు ఇంకా చాలా దూరంలో ఉందని రాజకీయ వర్గాలు, పౌర సంఘాలు అభిప్రాయపడుతున్నాయి.