హైదరాబాద్‌లో 'వర్క్ ఫ్రమ్ పార్క్' ప్లాన్.. పార్కుల్లోనే ఆఫీసు పని

హైదరాబాద్ నగరంలోని ప్రధాన పార్కుల్లో ఉద్యోగులు కూర్చుని పని చేసుకునేలా 'వర్క్ ఫ్రమ్ పార్క్' ఏర్పాటు చేయాలని నగర పాలక సంస్థ అధికారులు ప్రణాళికలు రూపొందిస్తున్నారు. నగరంలోని మూడు కార్పొరేషన్ల పరిధిలో ఈ విధానాన్ని అమలు చేయాలని భావిస్తున్నారు.

సైబరాబాద్ మున్సిపల్ కార్పొరేషన్ పరిధిలో రెండు పార్కులను ఇప్పటికే ఈ మాదిరిగా అభివృద్ధి చేస్తున్నారు. ఆ ప్రాంతాలకు వచ్చి ఉద్యోగులు తమ ఆఫీసు పనులు చేసుకోవచ్చు. హైదరాబాద్‌లోని అనేక ప్రాంతాలకు ఈ కాన్సెప్ట్‌ను విస్తరించేందుకు అధికారులు ఏర్పాట్లు చేస్తున్నారు.

పార్కుల్లో టాయిలెట్లు, క్యాంటీన్ సౌకర్యాలు కల్పించాలని అధికారులు నిర్ణయించారు. ఆహారం, కాఫీ కోసం ఉద్యోగులు బయటికి వెళ్లాల్సిన అవసరం ఉండదు. అక్కడే తిని, పని చేసుకోవచ్చు. లైబ్రరీ తరహా నిర్మాణం కూడా ఏర్పాటు చేస్తున్నారు.

తుమ్మిడిగుంట చెరువు పునరుద్ధరణ పనుల ప్రారంభోత్సవం సందర్భంగా ముఖ్యమంత్రి రేవంత్ రెడ్డి ఈ అంశాన్ని ప్రస్తావించారు. పార్కులు, చెరువుల పరిసరాల్లో 'వర్క్ ఫ్రమ్ పార్క్', 'వర్క్ ఫ్రమ్ లేక్' తరహా ఏర్పాట్లు చేపట్టే ఆలోచన ఉందని ఆయన చెప్పారు.

నగరంలోని పార్కుల విస్తీర్ణం రెండు ఎకరాల నుంచి 5, 10, 12 ఎకరాల వరకు ఉంది. ఉదయం, సాయంత్రం వాకర్స్ వచ్చే పార్కులు మధ్యాహ్నం ఖాళీగా ఉంటాయి. ఉదయం 9 నుంచి సాయంత్రం 5 గంటల వరకు ఈ స్థలాలను పూర్తిగా ఉపయోగించుకోవాలని అధికారులు భావిస్తున్నారు. దీని ద్వారా నగర ప్రజలకు ఎక్కువ సేవలు అందించాలనేది లక్ష్యం.