AP: ఉత్తర కోస్తాలో భారీ వర్షాల హెచ్చరిక; మూడు జిల్లాలకు అప్రమత్తత

బంగాళాఖాతంలో ఏర్పడిన అల్పపీడనం కారణంగా ఏపీలోని ఉత్తర కోస్తా జిల్లాల్లో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. విశాఖ తుఫాను హెచ్చరికల కేంద్రం డైరెక్టర్ డాక్టర్ పీఎల్ఎన్ మూర్తి ఈ వివరాలు వెల్లడించారు.

ప్రస్తుతం ఒడిస్సా, పశ్చిమ బెంగాల్ తీరానికి దగ్గరగా అల్పపీడనం కేంద్రీకృతమై ఉందని, కోస్తాంధ్ర నుంచి మహారాష్ట్ర వరకు ద్రోణి విస్తరించిందని చెప్పారు. దీని ప్రభావంతో గంటకు 40 నుంచి 50 కిలోమీటర్ల వేగంతో ఈదురుగాలులు వీచుతాయని, గరిష్టంగా 60 కిలోమీటర్ల వరకు వీచే అవకాశం ఉందని తెలిపారు.

భారీ వర్షాలు కురిసే అవకాశం ఉన్న జిల్లాలుగా విజయనగరం, శ్రీకాకుళం, పార్వతీపురం మన్యంలను గుర్తించారు. అదేవిధంగా కోస్తాలోని మిగతా 9 జిల్లాల్లో మోస్తరు వర్షాలు పడే అవకాశం ఉందని వాతావరణ శాఖ అంచనా వేసింది.

వర్షాల నేపథ్యంలో ప్రజలు అప్రమత్తంగా ఉండాలని, లోతట్టు ప్రాంతాల్లో జాగ్రత్తగా ఉండాలని విపత్తు నిర్వహణ సంస్థ హెచ్చరించింది. మరోవైపు రాష్ట్రంలోని కొన్ని ప్రాంతాల్లో ఉక్కపోతతో కూడిన వేడి వాతావరణం కొనసాగుతోందని, జంగమహేశ్వరపురం, బాపట్ల జిల్లాలో 41 డిగ్రీల సెంటీగ్రేడ్ ఉష్ణోగ్రత నమోదైందని చెప్పారు.

అల్పపీడనం క్రమంగా వాయువ్య దిశగా కదిలే అవకాశం ఉన్నందున రానున్న రెండు రోజుల్లో ఉత్తర కోస్తాలో వర్షాలు కొనసాగుతాయని వాతావరణ శాఖ నిపుణులు తెలిపారు.