హైదరాబాద్‌లోని టీ-వర్క్స్‌లో దేశంలోనే తొలి CMP ప్యాడ్ తయారీ హబ్ ప్రారంభం

దేశంలోనే తొలి CMP (కెమికల్ మెకానికల్ పాలిషింగ్) ప్యాడ్ తయారీ హబ్ హైదరాబాద్‌లోని టీ-వర్క్స్‌లో ప్రారంభమైంది. తెలంగాణ ఐటీ, పరిశ్రమల శాఖ మంత్రి దుద్దిల్ల శ్రీధర్ బాబు ఈ హబ్‌ను ప్రారంభించారు.

జపాన్‌కు చెందిన తోహేకే (Tohokei) కంపెనీతో కలిసి ఈ హబ్ ఏర్పాటు చేశారు. అత్యాధునికమైన ఈ CMP ప్యాడ్ ప్రాసెసింగ్ యంత్రం బహుళ అవసరాలకు ఉపయోగపడే రీతిలో రూపొందించబడింది. సెమీకండక్టర్ చిప్ ఉత్పత్తిలో వేఫర్లను పాలిష్ చేసే CMP ప్యాడ్‌లను ఇక్కడ తయారు చేస్తారు.

ప్రారంభోత్సవంలో మంత్రి శ్రీధర్ బాబు మాట్లాడుతూ, “దేశంలో ఇది తొలి చొరవ. చిప్ రంగంలో ప్రపంచ అవసరాలను తీర్చడంలో ఈ హబ్ కీలకం కానుంది” అని అన్నారు. సరిగ్గా ఒక ఏడాది క్రితం తోహేకే జనరల్ మేనేజర్ బృందం టీ-వర్క్స్‌లో పరిశోధనలు చేసి, ఈ ప్రాజెక్టుకు శ్రీకారం చుట్టిందని గుర్తు చేశారు.

దేశంలో సెమీకండక్టర్ పర్యావరణ వ్యవస్థ అభివృద్ధికి ఈ CMP ప్యాడ్ హబ్ ఒక ముఖ్యమైన ముందడుగు. టీ-వర్క్స్ స్టార్టప్‌లకు అండగా నిలిచే ఈ హబ్, దేశీయ చిప్ ఉత్పత్తి సామర్థ్యాన్ని పెంచనుంది.