ఐరాసలో పాకిస్తాన్ తీర్మానానికి భారత్, ఇజ్రాయిల్ వ్యతిరేక ఓటు

ఐక్యరాజ్యసమితి జనరల్ అసెంబ్లీ మొదటి కమిటీలో పాకిస్తాన్, బెలారస్ సంయుక్తంగా ప్రవేశపెట్టిన ఆయుధ నియంత్రణ తీర్మానానికి భారత్, ఇజ్రాయిల్ వ్యతిరేకంగా ఓటు వేశాయి. ఈ తీర్మానం 180 దేశాల మద్దతుతో ఆమోదం పొందింది.

ప్రాంతీయ, ఉప ప్రాంతీయ స్థాయిలో సంప్రదాయ ఆయుధాల నియంత్రణపై ఈ తీర్మానాన్ని రూపొందించారు. 193 సభ్య దేశాలు ఉన్న మొదటి కమిటీలో భారత్, ఇజ్రాయిల్ మాత్రమే వ్యతిరేకంగా ఓటు వేశాయి. ఓటింగ్‌లో ఏ దేశం కూడా తటస్థంగా ఉండలేదు.

ఐరాసలోని భారత శాశ్వత మిషన్ మొదటి కార్యదర్శి అన్మోల్ షేర్ సింగ్ బేడి ఈ ఓటుపై వివరణ ఇచ్చారు. ఒక ప్రాంతంలోని దేశాల భద్రతా ఆందోళనలు ఆ ప్రాంత భౌగోళిక సరిహద్దులకే పరిమితం కావని ఆయన అన్నారు. ప్రతి దేశ భద్రతా పరిగణనలు ప్రాంతీయ సరిహద్దులను దాటి విస్తరిస్తాయని ఆయన పేర్కొన్నారు.

ఆయుధ నియంత్రణను ప్రాంతీయ పరిమితులకే కుదించడం అవాస్తవికమని బేడి వ్యాఖ్యానించారు. 1993, 1999, 2017 సంవత్సరాల్లో ఇదే అంశంపై ఐరాస మార్గదర్శకాలు ఆమోదించిందని ఆయన గుర్తు చేశారు. మళ్లీ మొదటి నుంచి సూత్రాలు రూపొందించడం ఐరాస సమయాన్ని వృథా చేయడమేనని ఆయన తెలిపారు.