జకార్తాలో ప్రవాస భారతీయుల ప్రశంసలు.. ప్రధాని మోదీ ప్రసంగంపై 'అద్భుతం' అంటూ కామెంట్లు

ఇండోనేషియా పర్యటనలో భాగంగా ప్రధాని నరేంద్ర మోదీ జకార్తాలోని ప్రవాస భారతీయులను ఉద్దేశించి ప్రసంగించారు. సుదీర్ఘ ప్రసంగం అయినప్పటికీ, అక్కడి భారత సంతతి ప్రజలు ఆయన మాటలను ఎంతో ఆసక్తిగా విని ప్రశంసల వర్షం కురిపించారు. ఈ కార్యక్రమంలో ఇండోనేషియా అధ్యక్షుడు ప్రబోవో సుబియాంటో సైతం పాల్గొనడంతో ఇద్దరు నేతలను ఒకే వేదికపై చూసిన ప్రవాసులు ఉత్సాహంగా స్పందించారు.

తొమ్మిదేళ్ల అభ్యుక్త్ అనే బాలుడు మాట్లాడుతూ, 'ప్రసంగం పొడవుగా ఉన్నా చాలా బాగుంది. నేను చిన్నపిల్లవాడిని కాబట్టి ప్రజాస్వామ్యం గురించి పూర్తిగా అర్థం కాలేదు కానీ, మోదీ చెప్పిన విషయాలు ఆసక్తికరంగా ఉన్నాయి. ప్రభో గారి ప్రసంగం చాలా ఫన్నీగా, ఫార్మల్‌గా కాకుండా సహజంగా ఉంది' అని చెప్పాడు. మరో ప్రవాసి మాట్లాడుతూ, '2018 లో మోదీ ఒంటరిగా వచ్చారు, ఈసారి అధ్యక్షుడు ప్రభో కూడా వచ్చారు. ఇది చంద్రునికి చంద్రిక అన్నట్లయింది. ఆసియా ఆర్థిక వ్యవస్థకు చెందిన ఇద్దరు నేతలను కలిసి చూడటం చాలా సంతోషంగా ఉంది' అని వ్యాఖ్యానించాడు.

ప్రధాని మోదీ తన ప్రసంగంలో గత 12-13 సంవత్సరాల్లో భారత్ సాధించిన ప్రగతిని వివరించారు. ఈ విజయాలు భారత్‌కు మాత్రమే కాకుండా ఇండోనేషియా వంటి మిత్రదేశాలకు కూడా ఉపయోగపడతాయని ఆయన పేర్కొన్నారు. 'భారత్, ఇండోనేషియా కలిసి ముందుకు సాగుతాయి, ఈ పురోగతి ఆపలేనిది' అని మోదీ ఉద్ఘాటించారు.

ప్రవాస భారతీయ మహిళా సంఘం ప్రతినిధి లక్ష్మీ జైస్వాల్ మాట్లాడుతూ, 'ఇండోనేషియా మా కర్మభూమి, కానీ మా జన్మభూమి భారతదేశం. మా హృదయాల్లో భారత్ నివసిస్తుంది. ఇక్కడి పిల్లలకు మన సంస్కృతి, సంప్రదాయాలు నేర్పించడానికి బాల గోకులం తరగతులు నిర్వహిస్తున్నాం. యువత ముందుకు వచ్చి భారత్ కోసం ఏదైనా చేయాలని కోరుకుంటున్నాం' అని వివరించారు. ఆమె భారత్-ఇండోనేషియా మధ్య బహుముఖ సహకారాల కోసం ఎదురుచూస్తున్నట్లు తెలిపారు. ప్రసంగం ముగింపులో ప్రవాసులు 'వీ లవ్ యు మోదీ జీ' అంటూ నినాదాలు చేశారు.