భారత నౌకాదళంలోకి మూడు అత్యాధునిక స్వదేశీ యుద్ధ నౌకలు

పశ్చిమ బెంగాల్ రాజధాని కోల్‌కతాలోని శ్యామ ప్రసాద్ ముఖర్జీ పోర్టులో ప్రధాని నరేంద్ర మోదీ మూడు అత్యాధునిక స్వదేశీ యుద్ధ నౌకలను జాతికి అంకితం చేశారు. స్టెల్త్ ఫ్రిగేట్ దునగిరి, సర్వే నౌక సంశోధక్, జలాంతర్గామి విధ్వంసక నౌక అగ్రయా ఇవి నౌకాదళంలో చేరాయి.

దునగిరి అత్యాధునిక స్టెల్త్ యుద్ధ నౌక. ఇందులో బ్రహ్మోస్ క్షిపణులు, మధ్యశ్రేణి గగనతల క్షిపణి వ్యవస్థలు, శక్తివంతమైన సెన్సార్లు అమర్చారు. సుదీర్ఘ సముద్ర కార్యకలాపాలకు అనువుగా దీన్ని రూపొందించారు.

సంశోధక్ భారీ సర్వే నౌక. తీర ప్రాంత, లోతైన సముద్ర జలాల్లో హైడ్రోగ్రాఫిక్ సర్వేలు నిర్వహించడానికి, రక్షణ, పౌర అవసరాల కోసం సముద్ర గర్భ డేటా సేకరించడానికి ఈ నౌక ఉపయోగపడుతుంది.

అగ్రయా అనేది అర్ణల తరగతికి చెందిన జలాంతర్గామి విధ్వంసక నౌక. తీరప్రాంత జలాల్లో శత్రు జలాంతర్గాములను గుర్తించి నాశనం చేసేందుకు దీన్ని తయారు చేశారు.

రక్షణ రంగంలో స్వావలంబన కోసం భారత్ చేస్తున్న కృషికి ఈ మూడు నౌకలు నిదర్శనమని ప్రధాని మోదీ అన్నారు.