ఇండోనేషియా ఫ్లోరెస్ దగ్గర 7.7 తీవ్రతతో భారీ భూకంపం, సునామీ హెచ్చరిక జారీ

ఇండోనేషియాలోని ఫ్లోరెస్ ద్వీపం సమీపంలో శనివారం తెల్లవారుజామున 7.7 తీవ్రతతో భారీ భూకంపం సంభవించింది. ఫ్లోరెస్ ద్వీపం నుంచి 10 కిలోమీటర్ల లోతులో భూకంప కేంద్రం ఉన్నట్లు గుర్తించారు.

USGS సమాచారం ప్రకారం, ఎండేకు వాయువ్యంగా 68 కిలోమీటర్ల దూరంలో ఈ భూకంపం కేంద్రీకృతమైంది. గంటన్నర వ్యవధిలోనే ఐదు భూప్రకంపనలు సంభవించాయి. వీటిలో 5, 6.1, 5.6, 5.9 తీవ్రతలతో వరుస ప్రకంపనలు నమోదయ్యాయి. భూకంప భయంతో జనం ఇళ్ల నుంచి బయటకు పరుగులు తీశారు.

ఈ ఘటనలో ఇద్దరు మృతి చెందినట్లు ప్రాథమిక సమాచారం వచ్చింది. నగేకియా రీజెన్సీలో కొన్ని భవనాలు దెబ్బతిన్నట్లు తెలిసింది. అయితే, ఇప్పటివరకు ప్రాణనష్టం నమోదు కాలేదని అధికారులు తర్వాత ప్రకటించారు.

ఇండోనేషియా వాతావరణ, భూభౌతిక శాస్త్ర సంస్థ BMKG సునామీ హెచ్చరిక జారీ చేసింది. తూర్పు నుసా టెంగారా, దక్షిణ సులవేసి, పశ్చిమ నుసా టెంగారా ప్రావిన్సులకు ఈ హెచ్చరిక వర్తిస్తుంది. సముద్రంలో 0.5 మీటర్ల నుంచి 3 మీటర్ల ఎత్తు వరకు అలలు వచ్చే అవకాశం ఉందని అధికారులు తెలిపారు. మౌమరే పట్టణ ప్రజలను, తీర ప్రాంత వాసులను ఎత్తైన ప్రదేశాలకు తరలిస్తున్నారు. కొన్ని ప్రాంతాల్లో 19 నుంచి 30 సెంటీమీటర్ల ఎత్తైన చిన్న సునామీ అలలు గమనించారు.

ఇండోనేషియా పసిఫిక్ రింగ్ ఆఫ్ ఫైర్ ప్రాంతంలో ఉండటం వల్ల ఇక్కడ భూకంపాలు తరచుగా వస్తుంటాయి. ప్రస్తుతం తూర్పు నుసా టెంగారా ప్రాంతంలో హై అలర్ట్ కొనసాగుతోంది. ఎమర్జెన్సీ బృందాలు సహాయక చర్యలు చేపడుతున్నాయి.