విజయవాడ ఇంద్రకీలాద్రిపై శరన్నవరాత్రి ఉత్సవాలు ప్రారంభం

ప్రముఖ పుణ్యక్షేత్రమైన విజయవాడ ఇంద్రకీలాద్రిపై శరన్నవరాత్రి ఉత్సవాలు ప్రారంభమయ్యాయి.

నేటి నుంచి ఈ నెల 20వ తేదీ వరకు 10 రోజుల పాటు ఈ ఉత్సవాలు జరుగుతాయి. తొలి రోజు అమ్మవారు బాలా త్రిపుర సుందరి దేవి అలంకారంలో భక్తులకు దర్శనం ఇస్తున్నారు.

ఈ రోజు ఉదయం 8 గంటల నుంచి దర్శనం ప్రారంభమైంది. రెండో రోజు నుంచి ఉదయం 4 గంటల నుంచి రాత్రి 11 గంటల వరకు దర్శనం ఉంటుంది. ప్రతిరోజు రాత్రి 11 గంటలకు దర్శనం నిలిపివేసి, మరుసటి రోజు అలంకారం ఏర్పాటు చేస్తారు.

తెల్లవారుజాము నుంచే భక్తులు క్యూ లైన్లలో వేలాదిగా వచ్చారు. భవానీ భక్తులు కూడా ఈరోజు నుంచి 11 రోజుల దీక్ష ప్రారంభించారు. ఇంద్రకీలాద్రి ప్రాంతంలో భక్తుల రద్దీ ఎక్కువగా ఉంది.