ఇన్‌స్టాగ్రామ్‌లో పరిచయం పెంచుకుని బాలికపై లైంగిక దాడికి పాల్పడిన యువకుడు అరెస్ట్

హైదరాబాద్‌లోని ఫిలిం నగర్ పోలీసులు ఒక యువకుడిని అరెస్ట్ చేశారు. ఇన్‌స్టాగ్రామ్ ద్వారా పరిచయమైన మైనర్ బాలికపై లైంగిక దాడికి పాల్పడి, నగదు, బంగారు ఆభరణాలు కొల్లగొట్టినట్లు పోలీసులు తెలిపారు. నిందితుడు ఫిలిం నగర్ లోని మామలకుంటకు చెందిన పవన్ అలియాస్ తరుణ్.

బాధితురాలి ఫిర్యాదు ఆధారంగా పోలీసులు పోక్సో, SC/ST అట్రాసిటీ చట్టాల కింద కేసు నమోదు చేశారు. దర్యాప్తులో నిందితుడు గతంలో జడ్చర్లకు చెందిన యువతిని ప్రేమించి మోసం చేసి, ఆలయంలో వివాహం చేసుకున్నట్లు గుర్తించారు. ఇన్‌స్టాగ్రామ్ లో లభించిన ఆధారాలు, ఫోన్ నెంబర్ సాయంతో నిందితుడిని పట్టుకున్నారు.

నిందితుడిపై ఇప్పటికే రెండు పోక్సో కేసులు నమోదైనట్లు పోలీసులు వెల్లడించారు. గత ఏడాది మరో బాలికపై లైంగిక దాడి కేసులో అరెస్ట్ అయి రెండు నెలలు జైలు శిక్ష అనుభవించాడు. నిందితుడు చేతిలో మరికొందరు యువతులు మోసపోయి ఉండొచ్చని పోలీసులు అనుమానిస్తున్నారు. కేసు దర్యాప్తు కొనసాగుతోందని పోలీసులు తెలిపారు.