వరిలో సమగ్ర సస్యరక్షణ చర్యలు – శాస్త్రవేత్త సూచనలు

తెలుగు రాష్ట్రాల్లో రైతులు కరీఫ్ వరి నారుమళ్ళు పోయడం పూర్తి చేసి నాట్లు వేస్తున్నారు. ఈ దశలో వరిని ఆశించే కాండం తొలుచు పురుగు, ఉల్లికోడు వంటి చీడలు 10 నుంచి 30 శాతం దిగుబడి నష్టం కలిగించే ప్రమాదం ఉందని కరీంనగర్ జిల్లా ఏరువాక కేంద్రం శాస్త్రవేత్త రాజేంద్ర ప్రసాద్ హెచ్చరిస్తున్నారు.

ఆయన తెలిపిన వివరాల ప్రకారం, కాండం తొలుచు పురుగు నారుమడి నుంచి కంకి దశ వరకు ఆశిస్తుంది. ఆకుల కొనలపై 100 నుంచి 300 గుడ్లు పెడుతుంది. దీని నివారణకు నారుమడి దశలో వేప కషాయం 5 మి.లీ. లీటరు నీటిలో కలిపి పిచికారీ చేయాలి. లేదా కార్బో ఫ్యురాన్ 3జి గుళికలు ఎకరాకు సరిపడా 800 గ్రాములు వేయాలి. నాట్లు వేసిన 10–15 రోజుల తర్వాత పురుగు కనిపిస్తే కార్బో ఫ్యురాన్ 3జి 10 కిలోలు లేదా కార్టాప్ హైడ్రోక్లోరైడ్ 4జి 8 కిలోలు లేదా క్లోరాన్ట్రానిలిప్రోల్ 0.4జి 4 కిలోలు ఎకరాకు వేయాలని సూచించారు.

నాట్లు వేసిన 30 రోజుల్లోపు లింగాకర్షక బుట్టలు ఎకరాకు 8–10 అమర్చడం ద్వారా పురుగు సంఖ్య తగ్గించవచ్చు. చిరుపొట్ట దశలో తెల్లకంకులు కనిపిస్తే కార్టాప్ హైడ్రోక్లోరైడ్ 2 గ్రాములు లేదా క్లోరాన్ట్రానిలిప్రోల్ 0.3 మి.లీ. లీటరు నీటిలో కలిపి పిచికారీ చేయాలి. ఉల్లికోడు నివారణకు ముదిరిన నారు, ఆలస్య నాట్లు పెట్టకూడదు. నారుమడిలో కార్బో ఫ్యురాన్ 3జి 800 గ్రాములు వేయాలి. పిలక దశలో ఫిప్రోనిల్ 2.5–5 మి.లీ. లీటరు నీటిలో కలిపి పిచికారీ చేయాలని శాస్త్రవేత్త వివరించారు.

బ్యాక్టీరియా ఆకు ఎండు తెగులు ఎక్కువ వర్షపాతం, 22–26°C ఉష్ణోగ్రతల్లో తీవ్రమవుతుందని, నత్రజని ఎరువులు మోతాదుకు మించి వేయకుండా నియంత్రించవచ్చని రాజేంద్ర ప్రసాద్ తెలిపారు. తెగులు కనిపిస్తే ఆగ్రోమైసిన్ 0.4 గ్రాము లేదా ప్లాంటోమైసిన్ 0.2 గ్రాము లీటరు నీటిలో కలిపి పిచికారీ చేయాలి. గోధుమ ఆకుమచ్చ తెగులుకు కార్బండజిమ్ 1 గ్రాము లేదా ప్రొపికోనజోల్ 1 మి.లీ. లీటరు నీటిలో కలిపి పిచికారీ చేస్తే సమర్థంగా నిర్మూలించవచ్చని ఆయన సూచించారు.