అంతర్జాతీయ యోగా దినోత్సవం: యోగా ప్రాచీనత, ప్రయోజనాలు

ప్రతి సంవత్సరం జూన్ 21న అంతర్జాతీయ యోగా దినోత్సవం జరుపుకుంటారు. ప్రపంచవ్యాప్తంగా యోగా సాధనతో ఆరోగ్య ప్రయోజనాలు పొందుతున్నారు.

యోగా భారతదేశంలో సుమారు 5000 సంవత్సరాల క్రితం పుట్టింది. ఋషులు, మునులు దీన్ని అభివృద్ధి చేశారు. ‘యోగా’ పదం సంస్కృతంలో ‘యుజ్’ నుండి వచ్చింది. దీని అర్థం ఏకత్వం. మనసు, శరీరం, ఆత్మలను ఒకే చోటికి తీసుకురావడమే యోగా అని చెబుతారు.

యోగా గ్రంథాల ప్రకారం 84 లక్షల ఆసనాలు ఉన్నాయి. వాటిలో 84 ఆసనాలు ముఖ్యమైనవి. మానవ శరీరానికి 32 ఆసనాలు చాలా ఉపయోగకరం. రోజువారీ సాధనలో తాడాసనం, వృక్షాసనం, త్రికోణాసనం, భుజంగాసనం, వజ్రాసనం, పద్మాసనం, శవాసనం, ధనురాసనం, పశ్చిమోత్తానాసనం, సూర్య నమస్కారాలు ముఖ్యంగా చేస్తారు.

యోగా వల్ల ఏకాగ్రత పెరుగుతుంది. ఆసనాలు, ప్రాణాయామం, ధ్యానం శరీరాన్ని ఉల్లాసంగా, బలంగా ఉంచుతాయి. ప్రాణాయామం శ్వాసను నియంత్రించడంతో గుండె జబ్బులు రాకుండా ఉంటాయి. ధ్యానం మనసును ప్రశాంతంగా మారుస్తుంది.

యోగాతో బరువు తగ్గడం కష్టమని, వ్యాయామంతో పోలిస్తే శరీర దృఢత్వం రాదని కొందరు భావిస్తుంటారు. కానీ వ్యాయామం బాహ్య ఆకృతిని ఇస్తే, యోగా అంతర దృఢత్వాన్ని, మానసిక స్పష్టతను ఇస్తుంది. వయసు పెరిగినా కూడా యోగా సాధన సాధ్యం. నిపుణులు యోగాను రోజువారీ జీవితంలో భాగం చేసుకోవాలని సూచిస్తున్నారు.