స్మార్ట్ఫోన్ వాడకం పెరిగిండంతో జననాల రేటు తగ్గుముఖం పట్టిందని పరిశోధనలు

2007లో ఐఫోన్ విడుదలైన తర్వాత స్మార్ట్ఫోన్ వినియోగం తీవ్రంగా పెరిగింది. ఈ పెరుగుదల జననాల రేటు తగ్గుదలకు దారితీసిందని అమెరికా నేషనల్ బ్యూరో ఆఫ్ ఎకనామిక్ రీసెర్చ్ (NBER) ప్రచురించిన రెండు అధ్యయనాలు వెల్లడించాయి.

అమెరికాలో 2007 నుంచి 2024 వరకు 15–19 ఏళ్ల మహిళల్లో జననాలు 70 శాతం తగ్గాయి. 20–24 ఏళ్ల వారిలో ఈ తగ్గుదల 47 శాతంగా నమోదైంది. స్మార్ట్ఫోన్ల ప్రభావాన్ని ఖచ్చితంగా గుర్తించేందుకు పరిశోధకులు ఒక ప్రత్యేకమైన ప్రయోగం చేశారు. ఐఫోన్ అమెరికాలో కేవలం AT&T నెట్వర్క్ ద్వారా మాత్రమే అందుబాటులో ఉన్న కాలాన్ని (2007–2011) ఆధారంగా తీసుకున్నారు. AT&T నెట్వర్క్ పూర్తిగా లేని, పాక్షికంగా ఉన్న, పూర్తిస్థాయిలో ఉన్న ప్రాంతాలను పోల్చినప్పుడు ఒక స్పష్టమైన సంబంధం కనిపించింది. నెట్వర్క్ విస్తృతంగా ఉన్న ప్రాంతాల్లో 15–19 ఏళ్ల యువతుల జననాలు 26 శాతం వరకు తగ్గాయి. 2007–2011 మధ్య మొత్తం జననాల రేటు తగ్గుదలలో 33 నుంచి 52 శాతం వాటా కేవలం ఐఫోన్ యాక్సెస్ వల్లే ఏర్పడిందని ఈ అధ్యయనం గుర్తించింది.

స్మార్ట్ఫోన్ల వల్ల యువతిలో స్నేహితులతో ప్రత్యక్షంగా గడిపే సమయం తగ్గిపోయింది. దీనివల్ల శృంగార కార్యకలాపాలు తగ్గడం జననాలు క్షీణించడానికి ఒక కారణమని పరిశోధకులు చెబుతున్నారు. ఇంటర్నెట్లో పోర్నోగ్రఫీ వీక్షణ, కాంట్రాసెప్టివ్లు, అబార్షన్ల సమాచారానికి సులువుగా అందుబాటు పెరగడం కూడా ప్రభావం చూపింది. 2003లో రోజుకు సగటున 68 నిమిషాలు ఉన్న ప్రత్యక్ష సంభాషణ సమయం 2019 నాటికి 38 నిమిషాలకు పడిపోయింది. స్క్రీన్ ముందు గడిపే సమయం 22 నిమిషాల నుంచి 96 నిమిషాలకు పెరిగింది.

ఈ ట్రెండ్ కేవలం అమెరికాకే పరిమితం కారాదు. 128 దేశాల డేటాను ఉపయోగించి చేసిన మరో అధ్యయనం ప్రకారం, విభిన్న ఆరోగ్య వ్యవస్థలు, మత సంప్రదాయాలు ఉన్న ఇరాన్, కోస్టారికా, మెక్సికో, టర్కీ వంటి దేశాల్లోనూ స్మార్ట్ఫోన్ వాడకం పెరిగిన తర్వాతే టీనేజ్ జననాలు వేగంగా తగ్గాయి. భారతదేశం, బ్రెజిల్ వంటి మధ్య ఆదాయ దేశాల్లోనూ ఇప్పుడు జననాల రేటు పడిపోతోంది. ప్రస్తుత పరిస్థితుల్లో స్మార్ట్ఫోన్ ఒక్కటే కారణం కాకపోయినా, ప్రపంచ స్థాయిలో జనాభా మార్పుల్లో ఇది కీలక పాత్ర పోషిస్తోందని పరిశోధకులు భావిస్తున్నారు.