హార్మోజ్ జలసంధిని ఇరాన్ తిరిగి మూసివేత; చమురు సరఫరాకు అంతరాయం, ధరలు పెరిగే అవకాశం

హార్మోజ్ జలసంధిని ఇరాన్ మళ్లీ మూసివేసింది. ఈ మేరకు ఇరాన్ రివల్యూషనరీ గార్డ్ కార్ప్స్ (IRGC) ప్రకటించింది. ఈ ప్రాంతంలో అమెరికా జోక్యం తగ్గే వరకు జలసంధిని తెరవబోమని ఇరాన్ తెలిపింది.

అనుమతి లేని మార్గంలో ప్రయాణించిన ఒక అంతర్జాతీయ వాణిజ్య నౌకపై ఇరాన్ హెచ్చరిక కాల్పులు జరిపింది. ఆ తర్వాత ఆ నౌకపై క్రూయిజ్ క్షిపణి దాడి చేసినట్లు సమాచారం. నిబంధనలు ఉల్లంఘించి ప్రయాణించడంతో పాటు ట్రాకింగ్ సిస్టమ్ ఆఫ్ చేసినందుకే ఈ చర్య తీసుకున్నామని ఇరాన్ వెల్లడించింది.

ఈ దాడిని తీవ్రంగా పరిగణించిన అమెరికా హార్మోజ్ సమీపంలోని ఇరాన్ సైనిక లక్ష్యాలపై ఒకే వారంలో మూడుసార్లు దాడులు జరిపిందని అమెరికా సైన్యం తెలిపింది. ఈ దాడులు అమెరికా అధ్యక్షుడి ప్రత్యక్ష ఆదేశాలతో కొనసాగాయి.

ఉద్రిక్తతలు తగ్గించేందుకు ఇరాన్ విదేశాంగ మంత్రి అబ్బాస్ అరాక్షి ఓమన్ రాజధాని మస్కట్లో ఆ దేశ విదేశాంగ మంత్రితో సమావేశమైనా చర్చలు విఫలమయ్యాయని సమాచారం. ఒమన్ దౌత్య మార్గాలే శరణ్యమని స్పష్టం చేసింది.

ఇదే సమయంలో, మాజీ సుప్రీం లీడర్ అలీ ఖమేనీ హత్యకు ప్రతీకారం తప్పదని ఆయన కుమారుడు, ప్రస్తుత సుప్రీం లీడర్ ముస్తఫా ఖమేనీ హెచ్చరించారు. తండ్రి అంత్యక్రియల సందర్భంగా ఆయన ఈ వ్యాఖ్యలు చేశారు.

ఈ ఏడాది ఫిబ్రవరి 28న అమెరికా-ఇజ్రాయిల్ దాడుల్లో అలీ ఖమేనీ హత్యకు గురయ్యారు. దీంతో ప్రాంతంలో ఉద్రిక్తతలు పెరిగాయి. కొద్ది రోజుల క్రితం అమెరికా-ఇరాన్ మధ్య తాత్కాలిక శాంతి ఒప్పందం కుదిరినా, మళ్లీ పరస్పర దాడులు జరుగుతున్నాయి. మార్చి నుంచి మూసివేసిన ఈ జలసంధి కొన్ని వారాల క్రితం తెరుచుకున్నా తాజా ఘర్షణలతో మళ్లీ మూతపడింది.

ప్రపంచ చమురు సరఫరాలో 20% ఈ మార్గం గుండానే సాగుతుంది. జలసంధి మూసివేత చమురు సరఫరాకు ఆటంకం కలిగిస్తుంది. ఫలితంగా అంతర్జాతీయ మార్కెట్లో చమురు ధరలు పెరిగే అవకాశం ఉంది. ఇది భారత్తో సహా ప్రపంచ దేశాల్లో ఇంధన ధరలపై ప్రభావం చూపించవచ్చు.