అధిష్టానం ఆదేశిస్తే సిద్దిపేటలో హరీష్‌రావుపై పోటీ: జగ్గారెడ్డి

తెలంగాణ కాంగ్రెస్ వర్కింగ్ ప్రెసిడెంట్ జగ్గా రెడ్డి కీలక వ్యాఖ్యలు చేశారు. తాను సంగారెడ్డి నియోజకవర్గం నుంచి పోటీ చేయనని స్పష్టం చేశారు. తన భార్య నిర్మల జగ్గా రెడ్డి అక్కడ పోటీ చేస్తారని తెలిపారు. పార్టీ ఆదేశిస్తే సిద్దిపేటలో హరీష్ రావుపై పోటీకి సిద్ధంగా ఉన్నానని ప్రకటించారు.

రాష్ట్రంలో నియోజకవర్గాలు పెరుగుతాయని ముఖ్యమంత్రి రేవంత్ రెడ్డి చెప్పారని, వచ్చే ఎన్నికల్లో కాంగ్రెస్ 117 సీట్లు గెలుస్తుందని జగ్గా రెడ్డి అన్నారు. రెండేళ్ల ముందు నుంచే ఎన్నికలకు సిద్ధమవడం మంచి నిర్ణయమని అభిప్రాయపడ్డారు.

అభ్యర్థుల ఎంపిక పార్టీ ఇంచార్జ్, ఏఐసీసీ నిర్ణయిస్తుందని చెప్పారు. బీఆర్ఎస్, బీజేపీలకు అనుకూలంగా వచ్చే సర్వేలపై వ్యాఖ్యానిస్తూ, అవి నమ్మదగినవి కాదని సూచించారు.

ఇంటెలిజెన్స్ నివేదిక ఆధారంగా ఎమ్మెల్యేలు, మంత్రులను మందలించే హక్కు ముఖ్యమంత్రికి ఉందని, సూచనలను పాటించకపోతే టికెట్ నిరాకరించే అవకాశం ఉందని జగ్గా రెడ్డి స్పష్టం చేశారు.