80 ఏళ్ల తర్వాత జపాన్ తొలి గూఢచార సంస్థ ఏర్పాటు: రష్యా చేతుల మీదుగా ఉక్రెయిన్‌కు జపాన్ విడిభాగాలు

జపాన్ రెండో ప్రపంచ యుద్ధం తర్వాత తన మొట్టమొదటి కేంద్రీకృత గూఢచార సంస్థను నిర్మిస్తోంది. రష్యా సైనిక నిఘా విభాగం జపాన్-నిర్మిత టెక్నాలజీని ఉక్రెయిన్ యుద్ధంలో ఉపయోగిస్తున్న విషయం బయటపడటంతో ఈ చర్యకు శ్రీకారం చుట్టారు. న్యూయార్క్ టైమ్స్ దర్యాప్తు ప్రకారం, రష్యా ఉక్రెయిన్‌పై ప్రయోగిస్తున్న 90 శాతం క్షిపణులు, డ్రోన్లలో జపాన్ విడిభాగాలు ఉన్నాయి. వీటిని రష్యా సైనిక నిఘా సంస్థ ‘20వ డైరెక్టరేట్’ టోక్యోలోని ఒక ఎయిర్‌లైన్ కార్యాలయం ద్వారా స్మగ్లింగ్ చేస్తోంది. ఈ కార్యాలయం జపాన్ పోలీస్ ఇంటెలిజెన్స్ యూనిట్ ప్రధాన కార్యాలయానికి కేవలం 10 నిమిషాల నడక దూరంలో ఉండటం గమనార్హం.

ఎనిమిది దశాబ్దాలుగా జపాన్‌లో కేంద్రీకృత గూఢచార వ్యవస్థ లేదు. ప్రస్తుతం పోలీసులు, రక్షణ మంత్రిత్వ శాఖ, విదేశాంగ మంత్రిత్వ శాఖ సహా దాదాపు 33,000 మంది వివిధ ఇంటెలిజెన్స్ విధుల్లో ఉన్నారు కానీ వారి మధ్య సమన్వయం చాలా తక్కువ. ఈ అంతరాలు రష్యాకు సులభంగా విడిభాగాలను దొంగరవాణా చేయడానికి, శ్రీలంక, వియత్నాం వంటి మూడో దేశాల మీదుగా రవాణా చేయడానికి దోహదపడ్డాయి.

ప్రధాని సనై తకైచి ఈ పరిస్థితికి చెక్ పెట్టేందుకు సొంత గూఢచార సంస్థను ఏర్పాటు చేయడాన్ని వ్యక్తిగత ప్రాధాన్యతగా తీసుకున్నారు. 1945 తర్వాత జపాన్‌పై విధించిన భద్రతా పరిమితులను తొలగించే దిశగా ఇది ఒక అడుగు. ఇటీవలే ఆయుధ ఎగుమతి నిషేధాన్ని రద్దు చేసిన ఆమె, దేశ చరిత్రలోనే అతిపెద్ద రక్షణ విస్తీర్ణకు శ్రీకారం చుట్టారు. ఇప్పుడు కౌంటర్ ఎస్పియోనేజ్ చట్టం, విదేశీ పెట్టుబడులపై కఠిన నియంత్రణ, చివరికి CIA తరహాలో ఒక విదేశీ గూఢచార సేవను నిర్మించాలని భావిస్తున్నారు.

కొత్త ఏజెన్సీకి 400 మిలియన్ డాలర్ల బడ్జెట్ కేటాయించగా, సైబర్ సెక్యూరిటీ నిపుణులు, సాఫ్ట్‌వేర్ ఇంజనీర్లు, ఓవర్సీస్ లైజన్ సిబ్బంది సహా వందలాది మందిని నియమించనున్నారు. డిసెంబర్ నాటికి ఏజెన్సీ పూర్తిస్థాయిలో పనిచేయడం ప్రారంభిస్తుందని భావిస్తున్నారు. ప్రతిపక్ష నాయకులు మాత్రం యుద్ధకాల టోక్యో నిఘా సంస్థ ప్రజలపై నిఘా పెట్టిన చరిత్రను ఉటంకిస్తూ ఇది ప్రైవసీని దెబ్బతీస్తుందని హెచ్చరిస్తున్నారు. బీజింగ్ కూడా తకైచి విధానాన్ని సైనికీకరణగా విమర్శించింది.