జూలై 18న ఊరువాడ సామాజిక సేవా కార్యక్రమం, రాజకీయ ప్రవేశం కాదు: ఎన్టీఆర్ టీం

నటుడు జూనియర్ ఎన్టీఆర్ రాజకీయాల్లోకి వస్తున్నారనే ఊహాగానాలకు ఆయన టీమ్ నుంచి అధికారిక స్పష్టత వచ్చింది. జూలై 18న జరగనున్న కార్యక్రమం రాజకీయ ప్రవేశానికి సంబంధించింది కాదని, అది ‘ఊరువాడ’ పేరుతో నిర్వహిస్తున్న సామాజిక సేవా కార్యక్రమమని వారు తెలిపారు.

గత కొన్ని రోజులుగా సోషల్ మీడియాలో ఎన్టీఆర్ రాజకీయ అరంగేట్రం చేయబోతున్నారని, ఆ తేదీన సంచలన ప్రకటన ఉంటుందని వార్తలు వచ్చాయి. తమిళనాడులో నటుడు విజయ్ రాజకీయ పార్టీ స్థాపించి విజయం సాధించడం ఈ ఊహాగానాలకు బలం చేకూర్చింది. టాలీవుడ్‌లో అల్లు అర్జున్ రాజకీయ ప్రవేశం చేస్తారనే వార్తలు కూడా వైరల్ అయ్యాయి.

ఎన్టీఆర్ గతంలో 2009లో తెలుగుదేశం పార్టీ కోసం రాష్ట్రవ్యాప్తంగా ప్రచారం చేశారు. కేంద్ర మంత్రి అమిత్‌ షాను కలవడం వంటి సంఘటనలు రాజకీయ ప్రవేశంపై ఊహాగానాలకు దారితీశాయి. ప్రస్తుతం సోషల్ మీడియాలో తిరుగుతున్న ప్రచారాన్ని ఆయన టీమ్ ఖండించింది. ‘ఊరువాడ కార్యక్రమం ముందుగానే ప్రణాళికాబద్ధంగా రూపొందించిన సామాజిక సేవ. ఇది రాజకీయాలతో ముడిపడి లేదు’ అని ఆ బృందం ఒక ప్రకటనలో తెలిపింది.