వైభవ్ సూర్యవంశి: కోహ్లి, సచిన్‌లతో పోల్చిన కపిల్ దేవ్; ప్రతిభ గొప్పదే కానీ ఓపిక అవసరం

భారత మాజీ కెప్టెన్, క్రికెట్ లెజెండ్ కపిల్ దేవ్, యంగ్ బ్యాటింగ్ సెన్సేషన్ వైభవ్ సూర్యవంశి గురించి కీలక వ్యాఖ్యలు చేశారు. వైభవ్ ప్రతిభ సచిన్ టెండూల్కర్, విరాట్ కోహ్లీలతో సమానమని కితాబిచ్చిన కపిల్, అయితే చిన్న వయసులోనే అతడిపై పెద్ద ఎత్తున ఒత్తిడి తీసుకురావద్దని హెచ్చరించారు.

బీహార్ కు చెందిన 14 ఏళ్ల వైభవ్ సూర్యవంశి, గత సంవత్సరం భారత అండర్-19 ఆసియా కప్ జట్టుకు ఎంపికై అందరి దృష్టిని ఆకర్షించాడు. కేవలం 13 ఏళ్ల వయసులోనే అండర్-19 స్థాయిలో ఆడిన అత్యంత పిన్న వయస్కుడిగా రికార్డు సృష్టించాడు. ఆ తర్వాత ఐపీఎల్ 2025 వేలంలో రాజస్థాన్ రాయల్స్ రూ.1.10 కోట్లకు అతన్ని కొనుగోలు చేసింది. ప్రస్తుతం అతడు ఇంగ్లాండ్ పర్యటనలో భారత అండర్-19 జట్టుతో ఆడుతున్నాడు.

ఒక ఇంటర్వ్యూలో మాట్లాడుతూ, ‘నేను వైభవ్ ను కొంచెం చూశాను. నిస్సందేహంగా అతనిలో భారీ టాలెంట్ ఉంది. టాలెంట్ పరంగా సచిన్, విరాట్‌లతో సమానం. కానీ, ఇప్పుడు మనం అతని గురించి చాలా ఎక్కువగా మాట్లాడుతున్నాం. దానివల్ల ప్రయోజనం లేదు. అతనికి సమయం ఇవ్వండి. చిన్న వయసులో ఉన్న ఆ కుర్రాడికి ఇంకా తన గురించి తనకే సరిగా తెలియదు’ అని కపిల్ స్పష్టం చేశారు.

‘టీ20 ఫార్మాట్‌లో బాగా ఆడగలడు. కానీ నిజమైన పరీక్ష టెస్ట్ క్రికెట్. టెస్ట్ మ్యాచ్‌లో అతను ఐదు ఓవర్ల పాటు క్రీజులో నిలవగలడా? వీరేంద్ర సెహ్వాగ్ లాగా ఆత్మవిశ్వాసంతో డిఫెండ్ చేయగలడా? ఇప్పటికిప్పుడు నిర్ణయించడం కష్టం’ అని ఆయన అన్నారు. అయితే, ‘ఇంత చిన్న వయసులో ఇంత ప్రభావం చూపడం చాలా అద్భుతం. ప్రపంచంలో ఒక శాతం మంది కూడా ఇలా చేయలేరు’ అని ప్రశంసలు కూడా కురిపించారు.

కపిల్ చేసిన పోలికతో వైభవ్‌పై అంచనాలు మరింత పెరిగాయి. కానీ కపిల్ సూచన ప్రకారం, యువ ఆటగాళ్లపై ఒత్తిడి తగ్గించేందుకు బీసీసీఐ, టీం మేనేజ్‌మెంట్ ప్రత్యేక శ్రద్ధ తీసుకోవాలన్న అభిప్రాయం వ్యక్తమవుతోంది. వైభవ్‌కు టెస్టు కెరీర్ ఇంకా ప్రారంభం కాలేదు. రానున్న రోజుల్లో దేశవాళీ క్రికెట్‌లో అతని ప్రదర్శనపై అందరి దృష్టి ఉంటుంది.