కరీంనగర్ జిల్లాలో లంచం ఆరోపణలపై సీఐ, ఎస్ఐ సస్పెండ్

కరీంనగర్ జిల్లా తిమ్మాపూర్ పోలీస్ స్టేషన్‌కు చెందిన సీఐ, ఎస్ఐ సహా ముగ్గురు పోలీసు సిబ్బందిని సస్పెండ్ చేశారు. JCB, ట్రాక్టర్ వాహనాలను విడుదల చేసేందుకు లంచం తీసుకున్నారన్న ఆరోపణలు వచ్చాయి.

వీరిని ముందుగా హెడ్ క్వార్టర్స్‌కు బదిలీ చేశారు. అంతర్గత విచారణలో లంచం ఆరోపణలు రుజువు కావడంతో సస్పెండ్ చేసినట్లు రూరల్ ASP విజయ్ కుమార్ తెలిపారు.

వైన్ షాప్ నిర్వాహకులకు PhonePe ద్వారా రూ.20,000 లంచం పంపినట్లు వాహన యజమాని నగునూరి బాబు నిరూపించారు. జరిమానా చలానా చెల్లించినా వాహనాలు విడుదల చేయలేదని ఆయన ఫిర్యాదులో పేర్కొన్నారు.

లంచం తీసుకునే అధికారులపై కఠిన చర్యలు తప్పవని పోలీసు ఉన్నతాధికారులు హెచ్చరించారు.